پیرس بارش سے نہیں ڈوبتا ، شہباز شریف کی ترقی دھوکہ

کراچی‘ لاہور (نیوز ایجنسیاں) چیئرمین پاکستان حریک انصاف عمران خان کا کہنا ہے کہ لاہور کو پیرس بنانے کے دعوے جھوٹے نکلے اب شہبازشریف گھر سے باہر نہیں نکل رہے کیوں کہ انہیں لوگوں کا ڈر ہے، قومی خزانے کابے دریغ استعمال کرنے والوں اور غیر ضروری منصوبوں پر اربوں روپے لٹانے والوں کو شرم آنی چاہئے، لاہور میں ہونے والی شدید بارشوں کے باعث اموات اور نقصانات کے بعد چیئرمین تحریک انصاف عمران خان نے شہر کے مختلف علاقوں کا دورہ کیا، اس موقع پر میڈیا سے بات کرتے ہوئے عمران خان کا کہنا تھا کہ لاہور کو پیرس بنانے کے دعوے جھوٹے نکلے، پیرس میں بارش ہو تو سڑکیں پانی میں نہیں ڈوبتیں، لاہور پر کھربوں روپے لگائے گئے لیکن سڑکوں کا برا حال ہے۔ ان خیالات کا اظہار چیئرمین عمران خان نے لاہور میںہونے والی بارش کے دوران لکشمی چوک، جی پی او اور دیگر علاقوں کے دورہ کے موقع پر کیا ، اس موقع پر جہانگیر خان ترین، عبدالعلیم خان، ڈاکٹر یاسمین راشد، عون چوہدری سمیت دیگر رہنماءاور کارکنوں کی بڑی تعداد میں شریک تھے، عمران خان نے کہا کہ اگر قوم کا پیسہ ایمانداری و دیانتداری سے خرچ کیا جاتا تو آج لاہور کی یہ صورتحال نہ ہوتی لیکن شریف خاندان نے عوام کے ٹیکس کا سارا پیسہ رائیونڈ پرلگا دیا اور 40 ارب روپے اشتہارات کے لیے استعمال کیے گئے، عوام کو پتہ چل گیا ہے کہ لاہور میں کیا ترقی ہوئی، اب شہباز شریف اس لئے باہر نہیں نکل رہے کہ انہیں لوگوں کا ڈر ہے۔ عمران خان نے کہاکہ اسی لئے تحریک انصاف نمائشی منصوبوں کی مخالف تھی لیکن قومی ترجیحات اور عوامی خواہشات سے بے خبر شریف برادران کی ساری توجہ کمیشن کھانے اور قومی دولت لوٹنے پر مرکوز تھی، عمران خان نے کہاکہ ایک بارش نے ساری ” ترقی ” دھوکر رکھ دی ہے جس سے نوازلیگ کا اصل چہرہ سامنے آگیا ہے، انہوں نے کہاکہ اس بارش سے ہونے والے نقصان کے ذمہ دار شہبازشریف ہیں جنہوں نے اپنی انا اور ضد کو حقائق پر ترجیح دی اور صوبائی دارالحکومت کو حالات کے رحم وکرم پر چھوڑ دیا، عمران خان نے کہا کہ مسلسل دس برس اقتدار میں رہنے والا وزیراعلی ایک شہر کو سیوریج کو سسٹم بھی نہیںدے سکا۔ عمران خان نے کہا ہے کہ لندن فلیٹس 1993 سے شریف خاندان کی ملکیت ہیں، صرف سیل ڈیڈ ہی دکھا دیتے تو قوم کے دو سال اور پیسہ ضائع نہ ہوتا۔ چیئرمین تحریک انصاف عمران خان نے لاہور میں بارش کے بعد کی صورتحال پر تنقید کرتے ہوئے کہا کہ پیرس میں بارش ہوتو سڑکیں پانی میں نہیں ڈوبتیںلاہور سے کراچی روانگی سے قبل میڈیا سے گفتگو کے دوران عمران خان نے کہا کہ پیسہ دیانتداری سے خرچ کیا ہوتا تو آج یہ صورتحال نہ ہوتی، شریف خاندان نے سارا پیسہ رائے ونڈ میں لگادیا۔ انہوں نے کہا کہ پیرس میں بارش ہوتو سڑکیں پانی میں نہیں ڈوبتیں، شہباز شریف باہر نکلنے کے قابل نہیں، عوام میں بڑا غصہ ہے، آدھے پاکستان کے پاس تعلیم کے مواقع میسر نہیں، جہاں عوام کے پاس تعلیم نا ہو وہ یہی کہے گی کہ کھاتا ہے تو لگاتا بھی تو ہے۔ عمران خان کی گاڑی ڈیوس روڈ پر ٹریفک جام میں بھی پھنسی، ان کا مزید کہنا تھا شریف برادران نے قرض لے کر اورنج ٹرین اور میٹرو بنائی، لاہور کو پیرس بنانے کے دعوے سنے تھے، شہباز شریف کہتے ہیں کراچی اور پشاور کو لاہور بنا دوں گا، 635 ارب روپے بجٹ کا آدھا لاہور پر خرچ ہوتا ہے، مگر عوام کے ٹیکس کا پیسہ رائیونڈ پر لگایا گیا۔ ان کا کہنا تھا کہ ڈرامے پائیدار نہیں ہوتے بلکہ ایسے ڈراموں کا وقت محدود ہوتا ہے۔ انہوں نے کہا کہ حالیہ انتخابات نظریہ کی بنیاد پر ہونے جا رہے ہیں۔ میں لیاری میں بلاول بھٹو کے قافلے پر پتھراو¿ کی سخت مذمت کرتا ہوں‘ ہم ملک میں صاف اور شفاف انتخابات چاہتے ہیں۔ عام انتخابات نظریہ پر ہوں گے۔ 1970 میں نظریاتی الیکشن ہوئے تھے اور اب الیکشن نظریہ کی بنیاد پر ہوں گے۔ انہوں نے کہا کہ نواز شریف ابھی تک یہ جواب نہیں دے سکے کہ لندن اپارٹمنٹس کس کے پیسے پر خریدے گئے۔ لاہور میں اتنا نقصان ہوا ہے جسے پورا کرنے کیلئے اربوں روپے خرچ ہوں گے۔ کراچی اور اسلام آباد میں پانی کا بحران ہے‘25 جولائی کا الیکشن نظریہ کی بنیاد پر ہوگا بڑے بڑے برج الٹ جائیں گے۔