انٹرنیشنل کرکٹ میں دوبارہ باﺅلنگ کےلئے تیارہوں،حفیظ

لاہور(مانیٹرنگ ڈیسک) پروفیسر کے نام سے جانے جانیوالے پاکستانی ٹیسٹ کرکٹر محمد حفیظ نے کہا ہے کہ میں باﺅلنگ ایشوز کے بعد واپسی پر مکمل طور پر ٹیم کو سپورٹ کرنے کے لیے تیار ہوں ۔ چینل فائیو کے پروگرام © گُگلی میں گفتگو کرتے ہوئے انکا کہناتھا کہ میرے لیے ٹاپ آرڈر بیٹنگ کمفرٹ زون ہے لیکن میں پروفیشنل کرکٹر ہوں کسی بھی نمبر پر کھیل سکتا ہوں۔ میری بری پرفارمنسز کے باوجود مجھے موقعے دینے پر اپنے کپتان اور سلیکٹرز کا شکر گزار ہوں جنہوں نے میرے برے دنوں میں میرا ٹیلنٹ پہچانا۔جب لوگوں نے رائے قائم کرلی تھی کہ حفیظ کو اب کرکٹ نہیں کھیلنا چاہیے۔ 2007 سے 2010 تک ٹیم میں مستقل جگہ نہیں بنا سکا۔ نیشنل کرکٹ اکیڈمی نے ان سالوں میں میرے کیرئیر کے لیے بہت کچھ کیا۔ 2010 میں کرکٹ میں واپسی پر مجھے رگڑا لگا جس نے مجھے ناکامی کو قبول کر کے مزید محنت کرنا سکھایا۔ پاکستان کے لیے نمبر ون آل راونڈر ٹیگ میرا خواب تھا جو پورا ہوا اور لوگوں کی رائے تبدیل ہو گئی۔ انہوں نے کہا کہ ابھی پاکستان کے لیے مزید کھیلنا چاہتا ہوں۔