سکاٹش ٹیم کو آسان سمجھنا سنگین غلطی ہو گی:رمیز

کراچی (یو این پی)سابق قومی کپتان رمیز راجہ نے کہا ہے کہ سکاٹ لینڈ کوآسان سمجھنے کی بھاری قیمت اداکرناپڑسکتی ہے۔میزبان سائیڈنے جس طرح گزشتہ روزانگلش ٹیم کو تگنی کاناچ نچایاوہ واقعی تعریف کے لائق ہے۔مختصر فارمیٹ میں ٹیموں میں زیادہ فرق نہیں ہوتا۔قومی ٹیم کوذمہ دارانہ کھیل کامظاہرہ کرناہوگا۔ انہوں نے مزید کہا کہ لارڈز ٹیسٹ میچ جیتنے کے بعد پاکستانی کرکٹ ٹیم کے پاس بہترین موقع تھا کہ وہ نئی تاریخ رقم کرتی لیکن سیریز ڈرا کرنے پر ہی اکتفا کرلیا گیا۔ انہوں نے کہا کہ نوجوان کرکٹرز کو سمجھنا ہو گا کہ ٹیسٹ کرکٹ میں اپنے حساب سے نہیں کھیلنا چاہئے بلکہ اگر وہ جیتنا چاہتے ہیں تو پھر انہیں بھرپور جنگ لڑنا ہو گی۔ رمیز راجہ کا کہنا تھا کہ پاکستان کی نوجوان ٹیم ہے جو سیکھنے کے مرحلے سے گزر رہی ہے لیکن اسے یہ بھی سمجھنا ہو گا کہ کسی بھی ٹیم کیخلاف آسانی سے ہتھیار نہیں ڈالے جاتے بلکہ لڑ کر ہارا جائے تو برا نہیں لگتا۔رمیز راجہ کا کہنا تھا کہ ابتداء ہی میں پلیئرز کو یہ اہم بات سیکھنا چاہئے کہ مقابلہ جم کر ہوتا ہے ورنہ انہیں آئندہ بھی آسانی سے ہار ماننے کی عادت پڑ جائے گی۔سابق قومی کپتان کا کہنا تھا کہ نوجوان کرکٹرز کو سمجھنا ہو گا کہ یہ ٹیسٹ کرکٹ ہے جس میں سیشن بائی سیشن کے اعتبار سے میچ کو اپنے حق میں کیا جاتا ہے جبکہ انہیں ملک اور قوم کے علاوہ خود اپنے وقار کیلئے بھی وہ کام کرنا ہوگا جو کہ ابھی تک پاکستانی سسٹم میں موجود نہیں ہے۔انہوں نے کہا کہ قومی کرکٹ ٹیم کو سمجھنا ہو گا کہ پاکستان قوم کرکٹ کے کھیل سے پیار کرتی ہے لہٰذا وہ خود سے وعدہ کریں کہ آئندہ ایسی غلطیاں نہیں دہرائیں گے اور اس طرح کی مایوس کن کارکردگی کا مظاہرہ کبھی مستقبل میں نہیں کریں گے۔