عظیم کپتان مصباح الحق الوداع ، کرکٹ کا بادشاہ تخت چھوڑ گیا

جمیکا(نیٹ نیوز) پاکستان کے عظیم کپتان مصباح الحق اپنے کیرئر کے آخر ی ٹیسٹ میچ کی دوسری اننگز میں 2رنز بنا کر آﺅٹ ہوگئے، گرآﺅنڈ سے الوداع ہوتے ہوئے جذباتی مناظر دیکھے گئے۔تفصیلات کے مطابق76ٹیسٹ میچوں میں پاکستان کی نمائندگی کرنے والے عظیم بلے باز مصباح الحق اپنے کیرئر کی آخری اننگز میں 2رنز بنا کر آﺅٹ ہوگئے، ان کے آﺅٹ ہوتے ہی سٹیڈیم میں جذباتی مناظر دیکھنے کو ملے، شائقین نے کھڑے ہوکر عظیم بلے باز کو رخصت کیا جبکہ قومی کرکٹ ٹیم کے کھلاڑیوں نے انہیں گارڈ آف آنرز پیش کیا،قومی ٹیم کے تمام کھلاڑی میدان میں آوگئے اور انہوں نے اپنے بلوں کے ذریعے تاج نماراستہ بنایا جس کے اندر سے گزرتے ہوئے مصباح الحق پولین میں داخل ہوئے ،اس مناظر کو دیکھ کر پولین تالیوں اور نعروں سے گونج اٹھا۔ وکٹ گرتے ہی یونس خان نے اپنا ہیلمنٹ اتار کر عظیم کپتان اور کھلاڑی کو گلے لگا کر رخصت کیا۔ گراﺅنڈ سے رخصت ہوتے ہوئے مصباح الحق کی آنکھیں آنسوﺅں سے نم تھیں۔ جبکہ مصباح الحق کی اہلیہ نے ہاتھوں پر بوسہ لے کر ان کی طرف بھیجا ،جسے سٹیڈیم میں موجود بڑی سکرین میں دکھایا گیا جس پر شائقین کی جانب سے تالیاں بجا کر داد دی گئی۔ اس موقع پر مصباح الحق کی بیٹی بھی ہاتھ ہلا کر اپنے والد کو گراﺅنڈ سے الوداع کر رہی تھی۔