پی سی بی میں جاری اختیارات کی جنگ سے کرکٹ کا بہت نقصان ہوگا

لاہور (آئی این پی) پاکستان کرکٹ بورڈ کے سابق چیئرمین ذکاءاشرف نے کہا ہے کہ پی سی بی میں جاری اختیارات کی جنگ سے کرکٹ کا بہت نقصان ہوگا ۔ پاکستان کرکٹ بورڈ کے سابق چیئرمین ذکاء اشرف نے کہا ہے کہ ان کے دور میں بنایا ہوا پی سی بی کا آئین معطل کرکے کرکٹ بورڈ میں ڈکٹیٹر شپ کو پروان چڑھایا گیا جس کا نقصان آج کرکٹ کو بھگتنا پڑ رہا ہے۔ انہوں نے کہا کہ ان کے دور میں پاکستانی ٹیم کی فتوحات کا سلسلہ عروج پر تھا مگر آئی سی سی نے اعتراض کر دیا کہ پی سی بی انٹرنیشنل کرکٹ کونسل کے اصول و ضوابط پر پورا نہیں اتر رہا ہے تاہم آئی سی سی نے ایک سال کا الٹی میٹم دیتے ہوئے کہا تھا کہ معاملات درست نہ کئے گئے تو پاکستان پر پابندی عائد کر دی جائے گی جس پر ہم نے دن رات کی محنت سے پی سی بی کا آئین تشکیل دے کر معاملات درست کئے گئے مگر آئین معطل کر دیا گیا۔ انہوں نے کہا پی ایس ایل ان کا آئیڈیا تھا جس سے ملک میں کرکٹ کی بحالی مقصود تھی تاہم فکسنگ اسکینڈل نے پوری قوم کا سرشرم سے جھکا د یا ہے۔