امریکہ پابندیاں نہیں ہٹاتا تو ہم بھی نہیں ہٹائیں گے

اسلام آباد (مانیٹرنگ ڈیسک) امریکی دفاعی اتاشی کی گاڑی کی ٹکر سے نوجوان کی ہلاکت پر پاکستان اور امریکا میں پیدا ہونے والا تناو¿ کم نہ ہو سکا۔ دونوں ملکوں کے درمیان مذاکرات کا دور ناکام رہا۔ دونوں ممالک سفارتکاروں پر عائد پابندیاں نہ ہٹانے پر بضد ہیں۔ ٹریفک حادثے میں پاکستانی نوجوان کی ہلاکت کے معاملے پر پاکستان اپنے موقف پر ڈٹ گیا ہے اور اس حوالے سے قائم مقام نائب امریکی وزیرِ خارجہ ایلس ویلز کو دو ٹوک پیغام دیدیا گیا ہے۔ اس وجہ سے دونوں ممالک کے درمیان تعلقات میں تناو¿ برقرار ہے۔ دونوں ممالک نے سفارتکاروں پر عائد پابندیاں ہٹانے سے ریز کا اظہار کیا ہے۔ذرائع کے مطابق سیکرٹری خارجہ تہمینہ جنجوعہ نے قائم مقام نائب امریکی وزیر خارجہ ایلس ویلز سے ملاقات میں اپنا موقف واضح کرتے ہوئے کہا کہ ویانا کنونشن اور ملکی قوانین کے تحت کارروائی کی جائے گی۔ پاکستان نے امریکی سفارت کاروں کی نقل و حرکت سے متعلق سکیورٹی وجوہات سے آگاہ کیا جبکہ امریکا میں پاکستانی سفارت کاروں پر سفری پابندیاں نہ لگانے کا مطالبہ کیا۔نجی ٹی وی کے ذرائع کے مطابق مذاکرات کے باوجود پاک امریکا تناو¿ میں کوئی کمی نہیں آ سکی ہے۔ دونوں ممالک سفارت کاروں کی نقل و حرکت محدود کرنے کے حوالے سے اپنے موقف پر قائم ہیں۔ تناو¿ کے خاتمے کے حوالے سے بات چیت جاری رکھنے کا فیصلہ کیا گیا ہے۔ ترجمان دفتر خارجہ کے مطابق قائم مقام نائب امریکی وزیر خارجہ ایلس ویلز نے اسلام آباد میں سیکرٹری خارجہ تہمینہ جنجوعہ سے ملاقات کی جس میں باہمی دلچسپی کے امور پر تبادلہ خیال سمیت پاک امریکا تعلقات میں تناو¿ پر بات چیت کی گئی۔ ترجمان کے مطابق ملاقات میں امریکی دفاعی اتاشی کرنل جوزف کی گاڑی کی ٹکر سے پاکستانی شہری کی ہلاکت کے معاملے پر غور سمیت پاکستان پر سفارتی حدود و قیود عائد کرنے کا معاملہ بھی زیر غور آیا۔