ٹم پین آسٹریلیا کے 46ویں ٹیسٹ کپتان بن گئے

جوہانسبرگ(اے پی پی) ٹم پین ٹیسٹ کرکٹ میں ٹیم کی قیادت کرنے والے 46ویں آسٹریلوی کپتان بن گئے، انہوں نے جمعہ کو جنوبی افریقہ کے خلاف شروع ہونے والے چوتھے اور آخری ٹیسٹ میچ میں کینگروز کی قیادت کر کے یہ اعزاز حاصل کیا۔، انہیں سٹیون سمتھ کی جگہ یہ ذمہ داری سونپی گئی ہے، جنوبی افریقہ کے خلاف کھیلے گئے تیسرے ٹیسٹ کے دوران بال ٹیمپرنگ اسکینڈل سامنے آنے پر انٹرنیشنل کرکٹ کونسل (آئی سی سی) نے سمتھ پر ایک میچ کی پابندی اور میچ فیس کا 100 فیصد جرمانہ عائد کیا تھا، بعدازاں کرکٹ آسٹریلیا نے بھی کارروائی کرتے ہوئے ان پر ایک سال تک انٹرنیشنل اور ڈومیسٹک کرکٹ کھیلنے پر پابندی عائد کی تھی۔