سینٹ ضمنی انتخاب‘ ووٹ دکھا کر ڈالنا مہنگا پڑگیا

اسلام آباد (این این آئی) چیف الیکشن کمشنر جسٹس سردار محمد رضا نے یکم مارچ 2018ءکو پنجاب کے ضمنی سینٹ انتخاب میں ووٹ دکھانے پر ایکشن لیتے ہوئے ممبر پنجاب اسمبلی حاجی ملک محمد وحید کو نوٹس جاری کرنے کے احکا مات جاری کر دیئے ووٹ کی رازداری کی خلاف ورزی کرنے پر مذکورہ ممبر اسمبلی کی اسمبلی رکنیت معطل بھی ہوسکتی ہے۔ تفصیلات کے مطابق یکم مارچ 2018ءکو ہونے والے پنجاب اسمبلی سینٹ الیکشن میں ووٹر اسمبلی ممبر حاجی ملک وحید نے ووٹ بیلٹ باکس میں ڈالنے سے پہلے ممبر اسمبلی بلال یاسین کو دکھایا جس پر الیکشن کمیشن کے ریٹرننگ آفیسر نے ان کو روکا اور ان کا ووٹ اسی وقت مسترد کردیا اور گنتی میں شمار نہیں ہوا۔ اس پر ریٹرننگ آفیسر پنجاب نے الیکشن کمیشن اسلام آباد کو رپورٹ بھیجی جس پر فوری کارروائی کرتے ہوئے چیف الیکشن کمشنر نے حاجی ملک وحید کو نوٹس جاری کرنے کے احکامات صادر کئے۔