یونس کا تاریخی بلا نیلام کر کے رقم عطیہ کرنے کا اعلان

جمیکا(نیوزایجنسیاں) ٹیسٹ کرکٹ میں 10 ہزار رنز مکمل کرنے والے یونس خان اپنا بیٹ نیلام کرکے رقم فلاحی ادارے کو عطیہ کریں گے۔یونس خان نے گزشتہ سال سماجی رابطے کی ویب سائٹ ٹوئٹر پر لکھا تھا کہ ”10 ہزار رنز مکمل کرنے کے بعد اپنا بیٹ نیلام کروں گا اور اس سے حاصل ہونے والی آمدن ٹی سی ایف پاک نامی فلاحی ادارے کو عطیہ کروں گا۔“گزشتہ روز ویسٹ انڈیز کے خلاف جمیکا ٹیسٹ کے دوران یونس خان نے 10 ہزار رنز کا سنگ میل عبور کیا۔ میچ سے قبل یونس خان کو اعزاز حاصل کرنے کے لئے 23 رنز درکار تھے جنہوں نے محتاط انداز سے کھیلتے ہوئے نہ صرف ٹیسٹ کیرئیر میں 10 ہزار رنز مکمل کئے بلکہ پاکستان کے پہلے کرکٹر بھی بن گئے۔واضح رہے کہ یونس خان اچھے کرکٹر ہونے کےساتھ فلاحی سرگرمیوں میں بھی بڑھ چڑھ کر حصہ لیتے ہیں اور ریٹائرمنٹ کے بعد وہ بچوں کی تعلیم کے حوالے سے کام کرنے کے خواہاں ہیں۔یونس خان نے ایک ویڈیو پیغام میں اس کامیابی کو ’فیملی، والدین اور باب وولمر کے نام‘ کیا ہے۔ یہ صرف میری نہیں پورے پاکستان کی کامیابی ہے۔پاکستان کے لیے ٹیسٹ کرکٹ میں سب سے زیادہ رنز بنانے والے یونس خان نے 26 فروری سنہ 2000 کو اپنے کیریئر کا پہلا ٹیسٹ سری لنکا کے خلاف راولپنڈی میں کھیلا اور اپنے پہلے ہی میچ کی دوسری اننگز میں ساتویں نمبر پر بیٹنگ کرتے ہوئے انھوں نے 107 رنز کی اننگز کھیلی تھی۔یونس خان نے پاکستان کی جانب سے ٹیسٹ کرکٹ میں سب سے زیادہ رنز بنانے کا جاوید میانداد کا ریکارڈ بھی اپنے نام کیا۔ انھوں نے انضمام الحق کا سب سے زیادہ 25 سنچریوں کا ریکارڈ بھی توڑا۔یونس خان کرکٹ کی تاریخ کے واحد بیٹسمین ہیں جنھوں نے تمام ٹیسٹ پلیئنگ نیشنز سمیت 11 ممالک میں سنچریاں کی ہیں۔یونس خان نے 13 فروری 2000 کو بین الاقوامی کریئر کا آغاز کراچی میں سری لنکا کے خلاف ایک روزہ سیریز سے کیا جہاں انھوں نے 46 رنز بنائے تھے۔یونس خان نے 265 ایک روزہ میچ کھیل کر 7249 رنز بنائے ہیں جن میں سات سنچریاں اور 48 نصف سنچریاں شامل ہیں۔ یونس خان نے اپنی قیادت میں پاکستان کو 2009 میں ٹی 20 کا عالمی چمپیئن بنایا جو 1992 کے ورلڈکپ میں فتح کے بعد پاکستان کرکٹ کا سب سے بڑا اعزاز تھا۔اس کے بعد انھوں نے ٹی 20 کرکٹ سے کنارہ کشی کا اعلان کیا تھا۔یونس خان کی ریٹائرمنٹ کے اعلان پر سابق کرکٹرز کی جانب سے بھی انھیں خراج تحسین پیش کیا جارہا ہے۔ سابق فاسٹ بولر شعیب اختر نے ٹوئٹر پر کہا کہ یونس خان کی پاکستان کرکٹ کے لیے ایمانداری اور بے لوث خدمات کے عوض ان کو ‘یونیک خان’ کا نام دیا جانا چاہیے۔شاہد آفریدی نے اپنے پیغام میں کہا کہ یونس خان ‘عظیم ترین کھلاڑیوں میں سے ایک ہیں۔