ٹی 10لیگ ،کرکٹرز پر نوٹوں کی بارش کرنے کا اعلان

عجمان (نیوزایجنسیاں) کرکٹ دنیا کا مہنگا ترین کھیل بنتا جا رہا ہے جس کا اندازہ اس بات سے لگایا جا سکتا ہے کہ رواں سال بھارتی کپتان ویرات کوہلی دنیا کے سب سے قیمتی کھلاڑیوں کی فہرست میںساتویں نمبر پر آئے۔کرکٹ کے کھیل میں کھلاڑیوں کو عمدہ کارکردگی پر مہنگے انعامات اور بڑی رقوم سے نوازا جاتا ہے لیکن شارجہ میں ہونے والی ٹی 10 لیگ کی انتظامیہ نے اس معاملے میں تمام حدیں پار کر دی ہیں۔ٹی 10 لیگ کی انتظامیہ اپنی لیگ کو کامیاب کرنے کیلئے ہر ممکن کوشش کر رہی ہے اور یہی وجہ ہے کہ کھلاڑیوں کو بہترین کارکردگی پر اکسانے کیلئے کروڑوں روپے کے انعامات کا اعلان کیا ہے۔غیر ملکی خبر رساں ادارے کے مطابق ٹی 10 لیگ 10 اوورز پر مشتمل ہو گی اور یہی وجہ ہے کہ اس میں سنچری بنانا ایک مشکل کام ہو گا مگر جو بھی بلے باز یہ کارنامہ سرانجام دے گا اسے دبئی میں 5 سے 6 لاکھ درہم (تقریباً ایک کروڑ 50 لاکھ پاکستانی روپے) مالیت کا سٹوڈیو اپارٹمنٹ دیا جائے گا۔اس لیگ میں نصف سنچری بنانا قدرے آسان ہو گا تاہم ان بلے بازوں کیلئے بھی بیش قیمتی انعامات کا اعلان کیا گیا ہے۔ کھلاڑیوں کو رولیکس کی گھڑی دی جائے گی جس کی مالیت 15 سے 20 لاکھ پاکستانی روپے بنتی ہے۔