کراچی(24 اپریل 2026): میچ کے دوران بدتمیزی اور تلخ کلامی پر فاسٹ باؤلر محمد عامر اور آل راؤنڈر فہیم اشرف پر جرمانہ عائد کر دیا گیا۔
پاکستان سپر لیگ کے 34 ویں میچ کے دوران بدتمیزی اور تلخ کلامی پر راولپنڈیز کے فاسٹ باؤلر محمد عامر اور اسلام آباد یونائیٹڈ کے آل راؤنڈر فہیم اشرف پر میچ فیس کا 10 فیصد جرمانہ عائد کر دیا گیا ہے۔
نیشنل بینک اسٹیڈیم میں جمعرات کو کھیلے گئے میچ میں دونوں کھلاڑیوں کو لیول ون کی خلاف ورزی کا مرتکب پایا گیا۔محمد عامر کو آرٹیکل 2.5 کی خلاف ورزی پر سزا دی گئی، جو کسی بلے باز کے آؤٹ ہونے پر ایسی زبان، اشارے یا عمل سے متعلق ہے جو اشتعال انگیزی کا باعث بن سکے۔
پی ایس ایل 11: محمد عامر اور فہیم اشرف کے درمیان تلخ کلامی کی ویڈیو وائرل
دوسری جانب فہیم اشرف پر آرٹیکل 2.21 کے تحت چارج لگایا گیا، جس کا تعلق کھیل کی ساکھ کو نقصان پہنچانے سے ہے۔ دونوں کھلاڑیوں نے آن فیلڈ امپائرز ایلکس وارف اور فیصل خان آفریدی کی جانب سے عائد کردہ الزامات کا اعتراف کیا، جس کے بعد میچ ریفری سر رچرڈ رچرڈسن نے جرمانے کی سزا سنائی۔
یاد رہے کہ یہ واقعہ 17 ویں اوور کی تیسری گیند پر پیش آیا جب عامر کی سلو باؤنسر پر فہیم اشرف وکٹ کیپر محمد رضوان کو کیچ دے بیٹھے۔ وکٹ لینے کے بعد عامر نے جارحانہ انداز میں فہیم اشرف کو پویلین جانے کا اشارہ کیا۔
جس پر فہیم نے غصے میں آکر بلے باز سے تلخ کلامی کی اور بیٹ لہرایا۔ صورتحال مزید خراب ہونے سے قبل آصف آفریدی اور سعد مسعود نے بیچ بچاؤ کرا کے دونوں کھلاڑیوں کو الگ کیا۔
واضح رہے کہ راولپنڈیز کی ٹیم نو میچوں میں صرف ایک جیت کے ساتھ پوائنٹس ٹیبل پر آخری نمبر پر ہے۔ ان کا اگلا اور آخری لیگ میچ 26 اپریل کو حیدرآباد کنگز مین کے خلاف ہوگا۔
