اسلام آباد : امریکا ایران مذاکرات کی کوریج کے لیے آئے غیر ملکی صحافیوں کو پاکستانی کھانے بھا گئے اور کہا "بریانی کا اصل مزہ تو یہاں ہے”۔
تفصیلات کے مطابق پاکستان کی ثالثی میں ہونے والے امریکہ اور ایران کے تاریخی مذاکرات کی کوریج کے لیے دنیا بھر سے آئے ہوئے غیر ملکی صحافی جہاں پاکستان کی سفارتی حکمت عملی کے معترف ہیں، وہی یہاں کی خوبصورتی اور لذیذ پکوانوں، خصوصاً بریانی کے دیوانے ہو گئے ہیں۔
ترکیہ کے مشہور خبر رساں ادارے ‘ٹی آر ٹی’ (TRT) سے منسلک ایک غیر ملکی صحافی نے پاکستان کے کردار کی تعریف کرتے ہوئے کہا "پاکستان نے حالیہ برسوں میں، بالخصوص غزہ کی صورتحال کے بعد، خطے میں ایک انتہائی اہم ثالث اور امن پسند ملک کے طور پر خود کو منوایا ہے۔”
انہوں نے مزید کہا کہ اس وقت امریکہ اور ایران جیسے بڑے فریقین کو مذاکرات کی میز پر لانا پاکستان کی سفارتی اہمیت اور عالمی ساکھ کی مضبوطی کا واضح ثبوت ہے۔
سنجیدہ سفارتی گفتگو کے ساتھ ساتھ غیر ملکی صحافی پاکستانی کھانوں کے سحر میں بھی گرفتار نظر آئے۔ ترک صحافی نے دلچسپ تبصرہ کرتے ہوئے کہا "ہم استنبول میں بریانی کے نام پر شاید کچھ اور ہی کھا رہے تھے۔ بریانی کا اصل اور حقیقی ذائقہ تو یہاں پاکستان آ کر معلوم ہوا ہے۔”
مذاکرات کی کوریج کے لیے آئے ہوئے متعدد غیر ملکی نمائندوں کا کہنا ہے کہ وہ پاکستان کی قدرتی خوبصورتی اور یہاں کے عوام کی مہمان نوازی دیکھ کر دنگ رہ گئے ہیں۔
اسلام آباد کے پرفضا مقامات اور "اسلام آباد ٹاکس” کے لیے شہر کی گئی سجاوٹ نے عالمی میڈیا کے نمائندوں کو بے حد متاثر کیا ہے۔
