ریئل اسٹیٹ انڈسٹری میں پہلی بار کسی عالمی شہرت یافتہ فلمی شخصیت کے نام پر ڈینوب پراپرٹیز نے ایک نئے تجارتی منصوبے کا اعلان کیا ہے۔ ’’Shahrukhz by Danube‘‘ کے نام سے یہ 55 منزلہ پریمیم کمرشل ٹاور دبئی کے مرکزی کاروباری خطے شیخ زاید روڈ پر تعمیر کیا جا رہا ہے۔ منصوبہ اپنے تصور اور برانڈ ویلیو کے اعتبار سے بین الاقوامی پراپرٹی مارکیٹ کا ایک اہم سنگِ میل قرار دیا جا رہا ہے۔
یہ شاندار منصوبہ ڈینوب گروپ کے بانی اور چیئرمین رضوان سجن اور بالی ووڈ کے عالمی اسٹار شاہ رخ خان کے درمیان 33 سالہ سفر کی باہمی کامیابیوں اور مسلسل جدوجہد کا علامتی اشتراک بھی ہے۔ منصوبے کا باقاعدہ اعلان ممبئی میں ایک اعلیٰ سطحی گالا ایونٹ کے دوران کیا گیا، جس میں کاروباری رہنماؤں، سرمایہ کاروں، صنعتکاروں اور معروف شخصیات نے شرکت کی۔ تقریب کی نوعیت اور شاندار شرکت نے اسے رواں سال بھارت کی سب سے نمایاں رئیل اسٹیٹ لانچ میں شامل کر دیا۔
دبئی کے جدید کاروباری نقشے میں نیا سنگِ بنیاد
10 لاکھ مربع فٹ پر محیط یہ جدید ٹاور، تعمیراتی معیار اور عالمی کارپوریٹ ضروریات کے مطابق ترتیب دیا گیا ہے، جس کا ہدف کاروباری ادارے، اسٹارٹ اپس، سلیکن ویلی طرز کے انوویٹرز اور تیز رفتاری سے بڑھتی کاروباری برانڈز ہیں۔ منصوبے کی ابتدائی قیمت 460,000 امریکی ڈالر سے شروع ہوگی، جو اسے خطے کے ہائی ویلیو پرائم کمرشل ایسٹ میں شامل کرتی ہے۔
منصوبے میں اسکائی پول، ایگزیکٹو بزنس لاؤنجز، مستقبل کی فضائی ٹرانسپورٹ کے لیے ہیلی پیڈ اور 40 سے زائد پریمیم سہولیات شامل ہوں گی۔ ڈینوب کی معروف 1 فیصد ماہانہ ادائیگی پلان پالیسی اس منصوبے میں بھی برقرار رکھی گئی ہے، جسے جائیداد کے حصول کا ایک جدید اور قابلِ رسائی ماڈل سمجھا جانے لگا ہے۔
تقریبِ رونمائی پر شاہ رخ خان کا بیان
تقریب سے خطاب کرتے ہوئے شاہ رخ خان نے کہا:
"یہ میرے لیے بہت بڑا اعزاز ہے۔ میری والدہ اگر آج زندہ ہوتیں تو بے حد خوش ہوتیں۔ جب میرے بچے اس جگہ آئیں گے تو میں فخر سے کہوں گا کہ دیکھو یہاں تمہارے والد کا نام لکھا ہے۔ میں گزشتہ دو ماہ سے اس منصوبے کی تفصیلات کا بغور جائزہ لے رہا ہوں، یہ واقعی جدید ترین تعمیرات کی ایک شاندار مثال ہے۔”
شاہ رخ خان نے مزید کہا کہ دبئی ہمیشہ سے ان کے لیے خواب، جذبے اور امکانات کا مرکز رہا ہے، اور اس منصوبے کو وہ محنت اور یقین کی علامت کے طور پر دیکھتے ہیں۔
ڈینوب گروپ کے چیئرمین رضوان سجن کا مؤقف
رضوان سجن نے اس منصوبے کو شاہ رخ خان اور ڈینوب کے مشترکہ وژن، ثابت قدمی، خود اعتمادی اور مسلسل جدوجہد کا تسلسل قرار دیتے ہوئے کہا کہ دونوں نے اپنے سفر کا آغاز نہایت سادہ بنیادوں سے کیا اور آج عالمی سطح پر شناخت حاصل کی۔
بین الاقوامی اعزاز
اس منصوبے کے ساتھ شاہ رخ خان دنیا کے پہلے ایسے سلیبریٹی بن گئے ہیں جن کے نام پر کمرشل بزنس ٹاور تعمیر کیا جا رہا ہے۔ منصوبے کی لوکیشن اسے دبئی کے اہم ترین مقامات — برج خلیفہ، دبئی انٹرنیشنل ایئرپورٹ اور گولڈ سوک — کے بالکل قریب ایک نمایاں عالمی بزنس ایڈریس بناتی ہے۔
