پاکستان اور آئی ایم ایف کے درمیان اسٹاف لیول معاہدے میں اہم پیشرفت

اسلام آباد (نیوز ڈیسک) عالمی مالیاتی فنڈ (آئی ایم ایف) کے مشن اور پاکستانی حکام کے درمیان اسٹاف لیول معاہدے پر بات چیت میں غیر معمولی پیشرفت ہوئی ہے۔ دوسرے ششماہی اقتصادی جائزے سے متعلق مذاکرات کا باضابطہ اعلامیہ جاری کردیا گیا ہے، جس میں قرض پروگرام کی شرائط پر عملدرآمد کو تسلی بخش اور مضبوط قرار دیا گیا ہے۔آئی ایم ایف کے جاری کردہ بیان کے مطابق، ایوا پیٹرووا کی قیادت میں مشن نے 24 ستمبر سے 8 اکتوبر تک کراچی اور اسلام آباد کا دورہ کیا۔ اس دوران پاکستانی حکام کے ساتھ توسیعی فنڈ سہولت (EFF) کے دوسرے جائزے اور ریزیلیئنس پروگرام کے پہلے جائزے پر تفصیلی گفتگو کی گئی۔اعلامیے میں کہا گیا ہے کہ پاکستان نے پروگرام کے تحت کیے گئے وعدوں پر عملدرآمد جاری رکھا ہے۔ مذاکرات میں کئی اہم امور پر پیش رفت ہوئی، جن میں مالیاتی نظم و ضبط کے ساتھ سیلاب متاثرین کی بحالی میں مدد، افراط زر کو اسٹیٹ بینک کے مقررہ ہدف کے اندر رکھنے کے لیے محتاط مالیاتی پالیسی، اور توانائی کے شعبے میں اصلاحات شامل ہیں۔مزید کہا گیا کہ بات چیت کے دوران سرکاری اداروں کے حجم میں کمی، شفافیت میں بہتری، اور گورننس کو مضبوط بنانے جیسے نکات بھی زیر غور آئے۔ آئی ایم ایف نے سفارش کی کہ مہنگائی کو قابو میں رکھنے کے لیے سخت مالیاتی پالیسی جاری رکھی جائے، جبکہ توانائی کے شعبے میں باقاعدہ ٹیرف ایڈجسٹمنٹ اور اصلاحات پر بھی اتفاق کیا گیا۔وزارت خزانہ کے حکام کا کہنا ہے کہ وہ 7 ارب ڈالر کے قرض پروگرام کے دوسرے جائزے کی کامیاب تکمیل کے حوالے سے پر امید ہیں، اور توقع ہے کہ یہ مرحلہ پاکستان کی معیشت کے استحکام میں اہم کردار ادا کرے گا۔