پاکستان کرکٹ بورڈ (پی سی بی) کے نئے چیئرمین کا انتخاب آج ہوگا، ممبر گورننگ بورڈ نگراں وزیراعلی پنجاب محسن نقوی نئے چیئرمین پی سی بی کے لیے مضبوط امیدوار ہیں۔
پی سی بی گورننگ بورڈ کا خصوصی اجلاس دو پہر 2 بجے نیشنل کرکٹ اکیڈمی میں ہوگا جس میں چیئرمین پی سی بی کا انتخاب کیا جائے گا، نگراں وزیر اعلیٰ پنجاب محسن نقوی نئے چیئرمین پی سی بی کے لیے مضبوط امیدوار ہیں۔
پی سی بی گورننگ بورڈ کا خصوصی اجلاس الیکشن کمشنر شاہ خاور نے طلب کیا ہے، جس میں 10 ارکان میں سے کوئی بھَی انتخاب لڑسکتا ہے مگر روایت ہے کہ پیٹرن بورڈ وزیراعظم کی طرف سے نامزد 2 ممبران میں سے ہی ایک کا چناؤ ہوتا ہے۔
گورننگ بورڈ میں پیٹرن کے 2 نمائندے محسن نقوی اور مصطفیٰ رمدے شامل ہیں، ان کے علاوہ آزاد جموں کشمیر ، ڈیرہ مرآد جمالی ، لاڑکانہ، بہاولپور ، سوئی ناردرن گیس ، غنی گلاس ، اسٹیٹ بینک اور پی ٹی وی گورننگ بورڈ کا حصہ ہیں ۔
اجلاس میں وزارت بین الصوبائی رابطہ کے سیکرٹری یا کوئی اور نمائندے نان ووٹنگ ممبر کی حیثیت سے شریک ہوں گے۔
ںگراں وزیر اعظم انوار الحق کی جانب سے محسن نقوی کو نامزد کیا گیا ہے جبکہ قوی امکان ہے کہ وہ بلامقابلہ چئرمین بورڈ منتخب ہوں گے اور پھر جلد پی سی بی کے چیئرمین کا جلدچارج سنبھالیں گے جبکہ وہ اس وقت نگران وزیراعلیٰ پنجاب کی ذمہ داریاں نبھارہے ہیں۔
