9 مئی کا دن شرپسندوں اور ملک دشمنوں کے چہروں کو آشکار کرتا رہے گا: سول سوسائٹی

لاہور: (ویب ڈیسک) جناح ہاؤس لاہور اور ریڈیو پاکستان پشاور میں سول سوسائٹی کی بڑی تعداد میں آمد کا سلسلہ جاری ہے۔ سینکڑوں طلباء و طالبات اور معاشرے کے مختلف طبقات نے دونوں مقامات کا دورہ کیا۔ سول سوسائٹی نے تاریخی عمارات کی شر پسندوں کے ہاتھوں تباہ کاریوں کو دیکھ کر شدید مذمت کا اظہار کیا۔ سول سوسائٹی کا کہنا تھا کہ ملکی تاریخ میں 9 مئی ایک سیاہ ترین دن کے طور پر ہمیشہ شرپسندوں اور ملک دشمنوں کے چہروں کو آشکار کرتا رہے گا، قوم کبھی ان ضمیر فروشوں کو معاف نہیں کریگی۔ یاد رہے کہ گزشتہ روز شوبز سے تعلق رکھنے والی شخصیات نے بھی لاہور میں جناح ہاؤس کا دورہ کیا تھا۔ واضح رہے کہ چیئرمین پی ٹی آئی عمران خان کی گرفتاری کے بعد پی ٹی آئی کی جانب سے فوجی تنصیبات اور سرکاری املاک پر دھاوا بولتے ہوئے توڑ پھوڑ کی تھی۔