مئی کا آخری ہفتہ خطرناک نظر آ رہا ہے، بہت کچھ ہونے والا ہے، منظور وسان

کراچی: (ویب ڈیسک) پیپلز پارٹی کے رہنما منظور وسان نے پیش گوئی کرتے ہوئے کہا ہے کہ مئی کا آخری ہفتہ خطرناک نظرآرہا ہے، بہت کچھ ہونے والا ہے۔
منظور وسان کا کہنا تھا کہ چیئرمین پی ٹی آئی عمران خان کا بظاہر کھیل ختم ہوتا جا رہا ہے، پی ڈی ایم کا ارادہ تھا کہ حکومت مدت پوری کرکے 8 اکتوبرکوالیکشن کروائے۔
انہوں نے کہا کہ حالات ایسے ہیں کہ رواں سال الیکشن ہوتے نظر نہیں آرہے ہیں،ملک میں کچھ بھی ہوسکتا ہے، بات ایمرجنسی سے بھی آگے جا سکتی ہے۔
منظور وسان نے پیشگوئی کرتے ہوئے کہا کہ ہوسکتا ہے کہ ملک میں کولیشن حکومت بنے، یہ بھی ہوسکتا ہے کہ آئین میں ترمیم کرکے الیکشن ایک سال کے لیے آگے بڑھائے جائیں۔
ان کا کہنا تھا کہ سیاستدانوں کو تحمل اور تدبر کیساتھ سوچ سمجھ کرفیصلے لینے چاہئیں، عمران خان کے پاس وقت تھا مگر انہوں نے وہ بھی ضائع کردیا۔
منظور وسان کا کہنا تھاکہ پی ٹی آئی اب پہلے جیسی پارٹی نہیں رہے گی، الیکشن میں بھی تحریک انصاف کے چند لوگ ہی کھڑے ہوں گے۔