چینی وزیر خارجہ چن گینگ 2 روزہ پر پاکستان پہنچ گئے

اسلام آباد: (ویب ڈیسک) چینی وزیر خارجہ چن گینگ دو روزہ دورہ پر پاکستان پہنچ گئے، چن گینگ کل پاک چین سٹریٹجک مذاکرات کے چوتھے دور میں شرکت کریں گے۔
چینی وزیر خارجہ چن گینگ بھارت سے پاکستان پہنچے ہیں، چن گینگ کا عہدہ سنبھالنے کے بعد یہ پہلا دو روزہ پاکستان کا دورہ ہے، پاک چین سٹریٹجک مذاکرات کے چوتھے دور کی صدارت وزیر خارجہ بلاول بھٹو اور چینی وزیر خارجہ مشترکہ طور پر کریں گے۔
پاک چین سٹریٹجک مذاکرات میں دو طرفہ اہم معاملات کا جائزہ لیا جاتا ہے، چینی وزیر خارجہ، بلاول بھٹو اور افغان وزیر خارجہ امیر متقی کے ہمراہ سہہ فریقی اجلاس میں بھی شرکت کریں گے۔
پاک چین سٹریٹجک مذاکرات کا تیسرا دور جولائی 2021 میں چین کے شہر چینگڈو میں ہوا تھا، سٹریٹجک مذاکرات کے دوران دونوں فریق پاکستان اور چین کے درمیان سٹریٹجک کوآپریٹو شراکت داری کی توثیق کریں گے۔
مہمان چینی وزیر خارجہ پاکستان اور چین کے درمیان کثیر الجہتی تعاون کے لیے روڈ میپ تیار کرنے، علاقائی اور عالمی منظر نامے پر بھی تبادلہ خیال کریں گے۔
چینی وزیر خارجہ چن گینگ کا دورہ چین اور پاکستان کے تعلقات کی اہمیت اور ان کی سٹریٹجک شراکت داری کو مزید مضبوط بنانے کے عزم کو اجاگر کرتا ہے۔