انگلینڈ میں مقامی کونسلز کی 8 ہزار سے زائد نشستوں پر انتخابات آج ہونگے

لندن : (ویب ڈیسک) انگلینڈ میں آج 230 مقامی کونسلز کی 8 ہزار سے زائد نشستوں پر انتخابات ہورہے ہیں ۔
انگلینڈ میں پولنگ کا عمل صبح 7 بجے سے شروع ہو کر رات 10 بجے تک جاری رہے گا۔
انتخابات میں پہلی مرتبہ ووٹ ڈالنے سے قبل شناختی کارڈ دکھانا لازمی قرار دیا گیا ہے، ووٹرز اپنا پاسپورٹ یا ڈرائیونگ لائسنس دکھا کر بھی ووٹ ڈال سکیں گے جبکہ 60 برس سے زائد عمر کے افراد اپنا بس پاس یا پارکنگ کا بلو بیج بھی دکھا سکیں گے۔
بولٹن، لیورپول، اولڈہم، وولورہیمپٹن سمیت 9 کونسلز کی تمام سیٹوں پر انتخابات ہوں گے ، بریڈ فورڈ، لیڈز، مانچسٹر، کوونٹری، راچڈیل اور والسال سمیت 23 کونسلز کی ایک تہائی نشستوں پر بھی انتخابات ہوں گے۔
لیسٹر، لوٹن، ناٹنگھم، سلاؤ، اور اسٹاک آن ٹرینٹ سمیت 32 یونیٹری کونسلز میں بھی مکمل انتخابات ہوں گے۔
105 ڈسٹرکٹ کونسلز میں مکمل جبکہ 47 ڈسٹرکٹ کونسلز میں ایک تہائی نشستوں پر انتخابات ہوں گے۔
بریڈ فورڈ، لیسٹر، مینز فیلڈ اور مڈلزبرا کے مقامی میئرز کے انتخابات کیلئے بھی ووٹنگ ہوگی۔
کنزرویٹو پارٹی 3300 سے زائد جبکہ لیبر پارٹی 2 ہزار سے زائد مقامی نشستوں کا دفاع کرے گی جبکہ لبرل ڈیموکریٹس 1200 سے زائد جبکہ گرین پارٹی 240 مقامی نشستوں کا دفاع کرے گی۔