ماہا علی کاظمی نے علی نور پر جنسی ہراسانی کا الزام عائد کر دیا

لاہور: (ویب ڈیسک) پاکستان کی معروف گلوکارہ ماہا علی کاظمی نے نوری بینڈ کے معروف گلوکار علی نور پر جنسی ہراسانی کا الزام عائد کر دیا۔
انسٹاگرام پر گلوکارہ ماہا علی کاظمی نے سٹوری پر ویڈیو پوسٹ کرتے ہوئے علی نور پر الزام عائد کیا ہے کہ گلوکار نے ان کو کوک سٹوڈیو میں آڈیشن کے دوران ہراساں کیا۔
ویڈیو پیغام میں انہوں نے بتایا کہ جب وہ کوک سٹوڈیو کے آڈیشن کیلئے گئیں تو علی نور نے ان سے نازیبا سوالات کیے اور انہیں ہراساں کرنے کی کوشش کی جبکہ انہیں آڈیشن کیلئے گانے بھی نہیں دیا اور احساس دلانے کی کوشش کی کہ وہ بہتر گلوکارہ نہیں ہیں۔
ماہا علی کاظمی نے علی نور پر انہیں زبردستی نشہ کروانے کی کوشش کرنے کا بھی الزام عائد کیا ہے، اپنے ویڈیو پیغام میں ماہا نے کہا کہ وہ چاہے مشہور گلوکارہ نہیں مگر ایسی خاتون بھی نہیں جو مشہور ہونے کیلئے کسی کی گندی آفر قبول کرلیں۔
ماہا علی کاظمی نے علی نور کو انتہائی گندی سوچ کا مالک اور خواتین کو ہراسانی کا نشانہ بنانے والا شخص قرار دیا ہے۔
اس سے قبل عائشہ بنت راشد نے بھی علی نور پر جنسی ہراسانی کے الزامات عائد کئے تھے تاہم بعد میں علی نور نے خاتون سے معافی مانگ لی تھی۔