ہیرا پھیری 3 کے منتظر مداحوں کے لیے اچھی خبر

ممبئی: (ویب ڈیسک) اگر آپ بالی وڈ کی معروف فلم سیریز ہیرا پھیری کے تیسرے حصے کے منتظر ہیں تو اچھی خبر یہ ہے کہ اس کی شوٹنگ شروع ہوگئی ہے۔
میڈیا رپورٹس کے مطابق ہیرا پھیری 3 کی عکسبندی کا آغاز 21 فروری کو ممبئی میں ہوا۔
اس فلم سیریز کے مداحوں کے لیے ایک اور اچھی خبر یہ ہے کہ اکشے کمار بھی ہیرا پھیری 3 میں کام کرنے کے لیے تیار ہوگئے ہیں۔
اس سے قبل نومبر میں ایسی رپورٹس سامنے آئی تھیں جن میں بتایا گیا تھا کہ اکشے کمار نے ہیرا پھیری 3 میں کام کرنے سے انکار کردیا ہے جس کے بعد اداکار کارتک آریان اس فلم میں کام کریں گے۔
اکشے کمار نے بھی اس موقع پر تصدیق کی تھی کہ وہ اسکرپٹ سے مطمئن نہ ہونے کے باعث ہیرا پھیری 3 میں کام نہیں کررہے۔
مگر ایسا لگتا ہے کہ فلم کے پروڈیوسر اکشے کمار کو فلم میں کام کرنے کے لیے منانے میں کامیاب ہوگئے۔
میڈیا رپورٹس کے مطابق پاریش راول، سنیل شیٹی اور اکشے کمار نے فلم کی عکسبندی کا آغاز کیا۔
رپورٹس میں بتایا گیا کہ اس حوالے سے ملاقاتیں کئی ماہ سے ہو رہی تھیں اور باضابطہ اعلان کے بغیر فلم کی عکسبندی شروع کی گئی۔
پہلے کہا جا رہا تھا کہ فلم کی ہدایات انیس بزمی دیں گے مگر اب ان کی جگہ فرہاد سامجی کی خدمات ڈائریکشن کے لیے حاصل کی گئی ہیں۔
البتہ فلم کی دیگر کاسٹ کے بارے میں تفصیلات ابھی سامنے نہیں آئیں جبکہ ریلیز کی تاریخ کا بھی اعلان نہیں ہوا۔
خیال رہے کہ بالی وڈ کی مقبول ترین فلم ‘ہیرا پھیری’ کو 2000 میں ریلیز کیا گیا تھا جس کی کامیابی کے بعد اس کا سیکوئل ‘پھر ہیرا پھیری’ 2006 میں ریلیز ہوا، دونوں میں اکشے کمار، پریش راول اور سنیل شیٹی نے مرکزی کردار ادا کیے تھے۔