پی ایس پی اور فاروق ستار نے خالد مقبول صدیقی کی سربراہی پر اتفاق کرلیا: گورنرسندھ

کراچی: (ویب ڈیسک) گورنر سندھ کامران ٹیسوری نے ایم کیوایم کے مختلف دھڑوں کے انضمام کی تصدیق کرتے ہوئےکہا ہےکہ پاک سرزمین پارٹی (پی ایس پی) اور فاروق ستار نے سربراہ ایم کیو ایم پاکستان خالد مقبول صدیقی کی سربراہی پر اتفاق کیا ہے۔
نجی ٹی وی کے پروگرام گفتگو کرتے ہوئےگورنر سندھ کامران ٹیسوری کا کہنا تھا کہ میں تمام دوستوں سےگزارش کرسکتا ہوں کسی کو مجبور نہیں کرسکتا، آپس میں الجھنے اور لڑائی جھگڑے سےکراچی کا نقصان ہوگا۔
کامران ٹیسوری کا کہنا تھا کہ ایم کیو ایم پاکستان کے سربراہ خالد مقبول صدیقی ہیں اور رہیں گے، سیاسی جماعتوں کو جوڑنے کی کوشش کر رہا ہوں توڑنےکی نہیں، جو بھی ہو وہ دیرپا، پائیدار اور کراچی کے لوگوں کی بہتری کے لیے ہو۔
گورنر سندھ کا کہنا تھا کہ اس وقت سیاست میں اداروں کی کسی قسم کی مداخلت نہیں ہے، ہمارا 75 سال میں بہت نقصان ہوا، آج بھی بنیادی ضروریات میسر نہیں۔
ان کا کہنا تھا کہ پی ٹی آئی کا زمانہ چلاگیا، کراچی ناراض ہےکسی کوووٹ نہیں دے رہا، حالیہ انتخابات میں پی ٹی آئی کو کراچی میں صرف 10فیصدووٹ پڑا، پی ٹی آئی کو جو ووٹ دلایا گیا اس کا انہوں نے خود ہی حشر نشرکر دیا، انہوں نےکراچی سمیت سندھ میں کوئی کام نہیں کیا۔
بانی متحدہ الطاف حسین کی سیاست میں واپسی کے سوال پر انہوں نےکہا کہ اگر کوئی پاکستان یا اس شہر کے خلاف بات کرے گا تو میں اُس کے خلاف کھڑا ہوں گا۔