سلمان خان کی سالگرہ کی تقریب میں شاہ رخ کا آنا مداحوں کو بھاگیا

ممبئی: (ویب ڈیسک) بالی وڈ کے سپر اسٹار سلمان خان آج اپنی 57 ویں سالگرہ منا رہے ہیں اور اس حوالے سے ہر سال کی طرح اس سال بھی انہوں نے شاندار برتھ ڈے پارٹی کا انعقاد کیا۔
ممبئی میں دبنگ خان کے جنم دن کی پارٹی رات 12 سے قبل ہی شروع ہوچکی تھی جو 12 بجتے ہی اپنے عروج پر پہنچ گئی، رات بھر وقتاً فوقتاً بھارتی فلم اور شوبز انڈسٹری سے وابستہ شخصیات اس کی زینت بنتی رہیں۔
تاہم سب سے زیادہ توجہ اور پیار جس شخصیت کی آمد کو ملا وہ کوئی اور نہیں بالی وڈ کے بے تاج بادشاہ شاہ رخ خان ہیں جن کی آمد نے سلمان کی سالگرہ کی تقریب میں چار چاند لگا دیے۔
دونوں اداکاروں کو طویل عرصے بعد ساتھ دیکھ کر ان کے مداحوں کی خوشی کا ٹھکانہ نہ رہا اور شاہ رخ خان کا بار بار سلمان کو پیار سے گلے لگانا بھی مداحوں کو بھاگیا۔
سلمان خان واپسی پرشاہ رخ کو گاڑی تک چھوڑنے آئے اور اس دوران کنگ خان نے کئی بار سلمان کو گلے سے لگایا اور سالگرہ کی مبارکباد دی۔ اس ملاقات کی ویڈیوز اور تصاویر سوشل میڈیا پر وائرل ہیں جنہوں نے لوگوں کو ’کرن ارجن‘ فلم کی یاد دلادی ہے جس میں سلمان اور شاہ رخ نے بھائیوں کا کردار ادا کیا تھا۔
شاہ رخ کے علاوہ جن معروف شخصیات نے پارٹی میں شرکت کی ان میں پوجا ہیگڑے، کارتک آریان، سنیل شیٹی، تبو وغیرہ شامل ہیں۔