انڈس ارتھ ٹرسٹ کی سیلاب سے متاثر پاکستان کی ساحلی آبادیوں کی مدد کیلئے کوکا کولا کمپنی کے ساتھ شراکت داری

کراچی: (ویب ڈیسک) انڈس ارتھ ٹرسٹ نے پاکستان میں نظر انداز کی گئی ساحلی آبادیوں کو سیلاب سے متعلق امداد کی فراہمی کیلئے کوکا کوکا کمپنی کے ساتھ شراکت داری کی ہے۔
ٹھٹھہ،سندھ میں تقریباً 1000گھرانوں کی امداد کیلئے 1کروڑ15لاکھ روپے کی مالی اعانت کی جائیگی۔یہ ٹیم سیلاب سے متاثرہ خاندانوں کو خوراک،پناہ گاہ،مچھر دانی،نہانے دھونے کی سہولیات،حفظان صحت کی کٹس اوربنیادی شیلٹر سپورٹ فراہم کرے گی۔ایسے گھرانوں پر خصوصی توجہ دی جائیگی،جن کی سربراہی خواتین،معذورافراد اور اقلیتی گروپ کرتے ہیں۔
اس شراکت داری کے تحت بنیادی امدادی سامان کی فراہمی کے علاوہ،لوگوں کو پینے کے صاف پانی کی سہولیات بھی فراہم کی جائینگی،اس مقصد کیلئے پانی کی عالمی فلاحی تنظیم بوند شمس کو شامل کیا گیا ہے،جو اپنے جدید،ارزاں اور توسیع پذیر شمسی توانائی سے چلنے والے آل ان ون واٹر پمپ اور فلٹریشن سسٹم کا استعمال کرتے ہوئے ایک عوامی مقام پر سولر واٹر باکس نصب کرینگے۔پراجیکٹ Tayaba.org کے ذریعہ صاف پانی تک رسائی کو مزید آسان بنانے کیلئے خواتین کو پانی کے آسان حصول کیلئے H2Oواٹر وہیلز بھی فراہم کئے جائینگے۔
کوکا کولا پاکستان کے نائب صدر فہد اشرف نے اس حوالے سے کہا کہ ”حالیہ تباہ کن سیلاب کے باعث پاکستان میں جس قدر نقصان ہوا ہے،اس کی مثال نہیں ملتی،متاثرہ افراد کی مدد کیلئے ہمیں ایک مشترکہ کاوش کی ضرورت ہے،بطور کوکا کولا،ہم پائیدار مشترکہ کمیونٹیز کی تعمیر کیلئے پرعزم ہیں اورانڈس ارتھ ٹرسٹ کے ساتھ یہ مشترکہ کوششیں اس عزم کا ایک حصہ ہیں۔“
حکومتی رپورٹوں کے مطابق سیلاب کے باعث پاکستان کا ایک تہائی رقبہ زیر آب آیا،اور آج تک کئی علاقوں میں سیلابی پانی جمع ہے اورصحت کیلئے خطرا ت کا باعث بنا ہوا ہے۔
انڈس ارتھ ٹرسٹ کے سی ای او شاہد سعید خان کا اس موقع پر کہنا تھا کہ ”پاکستان میں حالیہ سیلاب نے دنیا کو باور کروایا ہے کہ موسمیاتی تبدیلوں اور ماحولیاتی انحطاط سے نمٹنا ہماری اجتماعی اولین ترجیحات ہونی چاہئیں۔یہ نہ صرف ہماری زندگیوں کے تمام پہلوؤں بلکہ ایک ذی روح ہونے کے ناطہ ہماری بقاء پر بھی اثر انداز ہوتا ہے،انڈس ارتھ ٹرسٹ میں ہمارا وژن نظر انداز کی گئی ساحلی آبادیوں کے وقار کو ملحوظ خاطر رکھتے ہوئے ان کی ترقی کیلئے کام کرنا ہے،اس کیلئے کوکا کولا جیسی کمپنیوں کے ساتھ شراکت داری ان آبادیوں کی زیادہ سے زیادہ تعداد تک پہنچے میں کلیدی کردار ادا کرے گی۔“
اس بڑے پیمانے پر ہنگامی صورتحال کیلئے حکومت،مقامی و بین الاقوامی این جی اوز،اور کارپوریٹس سمیت ڈونرز کے درمیان مربوط مشترکہ کوششوں کی ضرورت ہے۔کولا کولا سیلاب کے بعد سے امدادی کاموں میں سب سے آگے ہے،کوکا کولا کمپنی کے عالمی فلاحی دست راست کولا کولا فاؤنڈیشن نے CARE International کو ڈھائی لاکھ امریکی ڈالر کی گرانٹ فراہم کی،جس نے ملک میں تقریباً1ہزار گھرانوں کیلئے ضروری سامان کی فراہمی کے حوالے سے فوری امدادی سرگرمیوں میں مدد کی۔