سعودی عرب کا طالبان سے خواتین کے تعلیم پر پابندی کا فیصلہ واپس لینے کا مطالبہ

ریاض: (ویب ڈیسک) سعودی عرب نے طالبان حکومت کی جانب سے خواتین پر اعلیٰ تعلیم حاصل کرنے پر پابندی کا فیصلہ واپس لینے کا مطالبہ کر دیا۔
میڈیا رپورٹ کے مطابق سعودی عرب کی وزارت خارجہ نے ایک بیان میں اس فیصلے پر حیرت اورافسوس کا اظہار کرتے ہوئے کہا کہ تمام مسلم ممالک کو بھی اس پرحیرت ہے۔ خواتین کی اعلیٰ تعلیم پرعائد پابندی کا فیصلہ ان کے جائز شرعی حقوق کے بھی منافی ہے ان حقوق میں تعلیم کا حق سرفہرست ہے، اعلیٰ تعلیم کی بدولت ہی خواتین اپنے ملک اورعوام کی خوشحالی، ترقی اور امن و استحکام میں اپنا کردار ادا کرسکتی ہیں۔
دوسری جانب اسلامی تعاون تنظیم (او آئی سی) نے بھی افغان خواتین پر یونیورسٹیوں کے دروازے بند کرنے پرافغان حکومت کی مذمت کی ہے۔ سیکریٹری جنرل حسین ابراہیم طہ نے کہا کہ افغان خواتین پر یونیورسٹیوں کے دروازے غیر معینہ مدت تک بند کرنے کے فیصلے پر تشویش ہے۔