پرویز الٰہی کا ہیلتھ کارڈ کے واجبات کی ادائیگی کیلئے وزیراعظم شہباز شریف کو خط

لاہور: (ویب ڈیسک) وزیراعلیٰ پنجاب چودھری پرویز الٰہی نے ہیلتھ کارڈ کے واجبات کی ادائیگی کیلئے وزیراعظم شہباز شریف کو خط لکھ دیا۔
چودھری پرویز الٰہی نے کہا کہ وفاقی حکومت نے ہیلتھ کارڈ کی مد میں ساڑھے 7 ارب روپے ادا کرنے ہیں، پنجاب نے ہیلتھ کارڈ کے واجبات کی مد میں سو فیصد ادائیگی کردی ہے، وفاق نے عوام کی فلاح و بہبود کے منصوبے کیلئے ایک روپیہ نہیں دیا، آزاد کشمیر، گلگت بلتستان اور اسلام آباد میں مریضوں کو ہیلتھ کارڈ پر علاج کیلئے حکومت پنجاب سہولت فراہم کررہی ہے، ہیلتھ کارڈ چیئرمین پی ٹی آئی عمران خان کا فلیگ شپ تاریخی پروگرام ہے۔
انہوں نے مزید کہا کہ ہیلتھ کارڈ کے ذریعے پنجاب کے تمام شہری جب اور جہاں چاہیں علاج کراسکتے ہیں، پنجاب کی تمام آبادی کو بلا امتیاز ہیلتھ کوریج فراہم کی جارہی ہے، پنجاب میں 821 ہسپتال بشمول 206 سرکاری اور615 پرائیویٹ ہسپتالوں میں ہیلتھ کارڈ پر مفت علاج کرایا جاسکتا ہے، پنجاب بھر میں ہیلتھ کارڈ پروگرام کے تحت سرکاری و نجی ہسپتالوں میں 80 ہزار بیڈز میسر ہیں، پنجاب کے ہیلتھ کارڈ پروگرام سے 28 لاکھ سے زائد لوگ مستفید ہوچکے ہیں، ہیلتھ کارڈ پروگرام کے تحت ڈائیلسز، کارڈیالوجی اور دیگر امراض کا علاج کرایا جاسکتا ہے۔
وزیراعلیٰ چودھری پرویزالٰہی کے زیرصدارت اعلیٰ سطح کا اجلاس ہوا جس میں سابق وفاقی وزیر مونس الٰہی نے شرکت کی، ہیلتھ کارڈ پروگرام پر تفصیلی بریفنگ دی گئی، صوبائی وزیر صحت ڈاکٹر یاسمین راشد، وزیر خزانہ محسن لغاری، چیف سیکرٹری عبداللہ خان سنبل، سیکرٹری فنانس واصف خورشید، سیکرٹری سپیشلائزڈ ہیلتھ کیئر اینڈ میڈیکل ایجوکیشن احمد جاوید قاضی، چیف ایگزیکٹو آفیسر پی ایچ آئی ایم سی اوردیگر نے اجلاس میں شرکت کی۔