فلوریڈا: طوفان سے معمولات زندگی تباہ، ایمرجنسی نافذ، سکول اور ایئرپورٹس بند

فلوریڈا: (ویب ڈیسک) امریکی ریاست فلوریڈا میں طوفان ’’آئن‘‘ نے معمولات زندگی مفلوج کر دیئے، سکول اور ایئرپورٹس بند کر دیئے گئے۔ حکام کے مطابق فلوریڈا میں اتنا شدید طوفان 100 سال کے دوران بھی نہیں آیا، انتظامیہ نے 20 لاکھ شہریوں کو علاقہ چھوڑنے کا حکم دے دیا، کسی بھی ہنگامی صورتحال سے نمٹنے کیلئے 5 ہزار نیشنل گارڈز کو الرٹ رکھنے کا حکم دے دیا گیا ہے جبکہ ایمرجنسی بھی نافذ کردی گئی ہے۔ فلوریڈا سے قبل طوفان نے کیوبا میں تباہی مچائی، طوفان سے سیکڑوں گھروں کی چھتیں اڑگئیں، 200 کلومیٹر کی رفتار سے چلنے والی ہواؤں نے نظام زندگی مفلوج کر کے رکھ دیا ہے، مواصلاتی نظام تباہ ہوگیا، 10 لاکھ سے زائد افراد بجلی سے محروم ہوگئے۔