نوجوان کو موبائل نمبر کی وجہ سے نوکری نہیں ملی

بیجنگ: (ویب ڈیسک) چین کی ایک کمپنی میں نوجوان کو اس کے موبائل نمبر کی وجہ سے نوکری نہیں ملی۔
عام طور پر جب آپ ملازمت کے لیے کسی کمپنی یا دفتر جاتے ہیں تو وہ آپ کی صلاحیتوں اور کام کو دیکھتے ہیں اور اسی کی بنیاد پر آپ کو ملازمت کے لیے منتخب کیا جاتا ہے لیکن چین میں پیش آنے والے واقعے نے سب کو حیران کر دیا۔
چین کی ایک کمپنی کے منیجر نے نوجوان کو صرف موبائل نمبر کی وجہ سے نوکری پر رکھنے سے انکار کر دیا اور اس کی درخواست پر لکھے فون نمبر پر بدقسمت لکھ کر درخواست مسترد کر دی۔
چین میں ایجوکیشن سے متعلق کام کرنے والی کمپنی کے منیجر نے درخواست گزار کو صرف اس لیے مسترد کیا کیونکہ ان کا موبائل فون نمبر کا پانچواں ہندسہ 5 تھا اور یہ منیجر 5 کے ہندسے کو اپنے لیے بدقسمتی سمجھتا تھا۔
چینی صوبے شینزین کی ایک کمپنی کے منیجر کو موبائل نمبر کی وجہ سے نوکری نہ دینے پر شدید تنقید کا نشانہ بنایا جا رہا ہے۔ منیجر کے اس اقدام کے بعد چین میں ایک مرتبہ پھر توہم پرستی کی بحث چھڑ گئی ہے جہاں توہم پرستی اب بھی کئی لوگوں کی زندگی کا حصہ ہے۔
سوشل میڈیا پر کمپنی سے متعلق کہا جارہا ہے کہ یہ کمپنی ان لوگوں کو ملازمت نہیں دیتی جن کے فون نمبرز کا پانچواں ہندسہ 5 ہو۔