ایف آئی اے کا سینیٹر سیف اللہ نیازی کے گھر پر چھاپہ

اسلام آباد: (ویب ڈیسک) پاکستان تحریک انصاف کے مرکزی رہنما رہنما عمر ایوب خان نے کہا ہے کہ وفاقی تحقیقاتی ادارے (ایف آئی اے) نے سینیٹر سیف اللہ نیازی کے گھر پہ چھاپہ مارا ہے۔
سابق وفاقی وزیر عمر ایوب خان نے یہ بات سماجی رابطوں کی ویب سائٹ ’ٹوئٹر‘ پر جاری کردہ بیان میں کہی ہے۔
پی ٹی آئی کے مرکزی رہنما عمر ایوب نے اپنے جاری کردہ بیان میں الزام عائد کیا کہ چھاپے کے دوران ایف آئی اے اہلکاروں نے سیف اللہ نیازی کا لیپ ٹاپ اور موبائل فون قبضے میں لے لیا ہے۔
انہوں نے کہا کہ فاشسٹ حکومت کے دن گنے جا چکے ہیں، انہیں عوامی غیض و غضب کا سامنا کرنا پڑے گا۔
پاکستان تحریک انصاف کے ہیڈ آف میڈیا افیئرز فواد چوہدری نے بھی سماجی رابطوں کی ویب سائٹ ’ٹوئٹر‘ پر جاری کردہ بیان میں کہا ہے کہ سیف اللہ نیازی ایک سینیٹر ہیں اس طرح ان کے گھر پر چھاپہ مارنا لیپ ٹاپ اور فون اٹھا کر لے جانا اور ہراساں کرنا اس نام نہاد حکومت کا ایک اور کارنامہ ہے۔
سابق وفاقی وزیر اطلاعات و نشریات فواد چودھری نے کہا کہ اس زیادتی کی شدید مذمت کرتے ہیں، چیئرمین سینٹ اور متعلقہ اداروں کو اس ضمن میں فوری ایکشن لینا چاہیے۔