نسیم شاہ کا دو چھکے مارنے والے بلے کو نیلام کرکے رقم عطیہ کرنے کا اعلان

لاہور: (ویب ڈیسک) افغانستان کے خلاف ایشیا کپ ٹی 20 کے سپر فور مرحلے کے اہم میچ میں پے در پے دو چھکے لگا کر پاکستان کو فائنل میں پہنچانے والے نسیم شاہ نے اپنا بلا نیلام کرنے اور اس سے ملنے والی رقم کو عطیہ کرنے کا اعلان کردیا۔
پاکستان کرکٹ بورڈ (پی سی بی ) کی جانب سے سماجی رابطے کی ویب سائٹ ٹوئٹر پر ویڈیو شیئر کی گئی جس میں محمد حسنین اور نسیم شاہ کو بلا تھامے دیکھا جاسکتا ہے۔
ویڈیو میں فاسٹ باؤلر محمد حسنین نے اپنا بلا نسیم شاہ کو بطور تحفہ دینے کا اعلان کرتے ہوئے کہا کہ میں یہ بیٹ نسیم شاہ کو دیتا ہوں آگے اس پہ ہے کہ یہ اس کا جو مرضی کرے۔
نسیم شاہ نے محمد حسنین سے بلا لیتے ہوئے کہا کہ میں اس بیٹ کو نیلامی کے لئے پیش کرنا چاہتا ہوں اور اس نیلامی سے ملنے والی رقم فنڈ اور خیرات کے کاموں کے لئے وقف کروں گا۔
خیال رہے کہ افغانستان کے خلاف ہاری ہوئی بازی جتوانے والے نسیم شاہ نے انکشاف کیا تھا کہ انہوں نے محمد حسنین کا بلا لیا تھا جس سے انہوں نے لگاتار دو چھکے مارے۔