کرن ارجُن ایک مرتبہ پھر بڑی اسکرین پر ساتھ جلوہ گر ہوں گے

ممبئی: (ویب ڈیسک) سن 1995 کی مشہورِ زمانہ فلم ’’کرن ارُجن ‘‘ کے بعد دوسری مرتبہ بالی ووڈ کے دونوں خان سلمان اور شاہ رُخ ایک ساتھ فلم میں جلوہ گر ہوں گے۔
بھارتی ویب سائٹ کی رپورٹ کے مطابق بالی ووڈ کے کنگ خان اور سلو میاں دونوں ایک ساتھ یش راج فلمز کے بینر تلے فلم کرنے جارہے ہیں جس کی کہانی ادتیا چوپڑا لکھ رہے ہیں تاہم فلم کا نام ابھی نہیں سوچا گیا۔
اس فلم کا مرکزی خیال تیار کیا جا چکا ہے جبکہ دتیا چوپڑا اس فلم کی کہانی، سکرین پلے اور ڈایئلاگ پر مزید کام کر رہے ہیں، مداحوں کےلئے یہ بڑی خوشخبری ہے کہ شاہ رخ خان اور سلمان خان کی کرن ارجن کے بعد یہ دوسری ایک ساتھ مکمل فلم ہوگی۔
بھارتی میڈیا کا کہنا ہے کہ اس فلم کی کہانی رواں سال کے آخر فلم میں مرکزی کردار نبھانے والے شاہ رخ خان اور سلمان خان کو سنائی جائے گی اور فلم کی شوٹنگ 2023 کے آخر یا 2024 کے اوائل میں شروع کی جائے گی۔
اطلاعات یہ بھی ہیں کہ فلم میں ہریتک روشن بھی نظر آئیں گے تاہم ان کا کیا کردار ہوگا یہ اب تک واضح نہیں ہوسکا۔
یاد رہے کہ اس سے قبل دونوں خان کرن ارجن میں مکمل جبکہ ہم تمھارے ہیں صنم، دشمن دنیا کا، کچھ کچھ ہوتا ہے، ہر دل جو پیار کرے گا، اوم شانتی اوم، ٹیوب لائٹ اور زیرو میں ایک ساتھ مختصر کردار ادا کر چکے ہیں۔