عمر اکمل کے الزامات، بورڈ نے انکوائری کمیٹی تشکیل دیدی

لاہور ( این این آئی) پاکستان کرکٹ بورڈ نے کرکٹر عمر اکمل کے قومی ٹیم کے ہیڈ کوچ مکی آرتھر پر لگائے گئے الزامات کی تحقیقات کے لیے کمیٹی تشکیل دےدی۔تفصیلات کے مطابق قومی کرکٹر عمر اکمل نے ہیڈ کوچ مکی آرتھر پر گالیاں دینے اور بدسلوکی کے الزامات عائد کیے تھے جن کی مکی آرتھر تردید کی تھی۔الزامات کے بعد پی سی بی نے عمر اکمل کو شوکاز نوٹس بھی جاری کیا جس کا انہوں نے رواں ہفتے جواب جمع کرایا جس میں انہوں نے کرکٹ بورڈ سے معاملے کی تحقیقات کے لیے کمیٹی تشکیل دینے کا بھی مطالبہ کیا۔جس پر پاکستان کرکٹ بورڈ نے تین رکنی انکوائری کمیٹی تشکیل دے دی ہے جس میں ڈائریکٹر کرکٹ ہارون رشید، ڈائریکٹر میڈیا امجد بھٹی اور جی ایم لیگل سلمان نصیر شامل ہیں۔ذرائع کے مطابق انکوائری کمیٹی کا پہلا اجلاس منگل کو ہو گا اور اس معاملے کو جلد از جلد نمٹانے کی کوشش کی جائے گی۔ذرائع کا کہنا ہے کہ تحقیقاتی کمیٹی تمام معاملات کا جائزہ لے گی اور عمر اکمل کی جانب سے ضابطہ اخلاق کی خلاف ورزی کو دیکھا جائے گا جبکہ دونوں فریقین کے بیانات بھی ریکارڈ کیے جائیں گے۔ذرائع نے بتایا کہ کمیٹی واقعے کے وقت موجود لوگوں تک رسائی حاصل کرکے ان سے بھی معلومات لے گی۔واضح رہے کہ عمر اکمل کے شوکاز نوٹس کے جواب میں پی سی بی ذرائع کا کہنا ہے کہ کرکٹر اپنے جواب سے کرکٹ بورڈ کو مطمئن نہیں کرسکے ہیں۔