حکومت بجلی کی قیمت میں بھی بڑے اضافے کو تیار

اسلام آباد: (ویب ڈیسک) حکومت کی جانب سے بجلی کی قیمت میں بھی بڑے اضافے کا امکان ہے۔
ذرائع کے مطابق حکومت کا آئندہ مالی سال میں بجلی ٹیرف میں 7 روپے فی یونٹ اضافے کا امکان ہے اور حکومت نے بجلی ٹیرف میں 7 روپے فی یونٹ اضافے کی حامی بھر لی ہے۔
بجلی کی قیمت میں اضافہ یکم جولائی سے شروع کیا جائے گا جبکہ عالمی مالیاتی ادارے (آئی ایم ایف) نے 2 ہزار 600 ارب روپے کے بجلی کے گردشی قرض پر تشویش کا اظہار کیا ہے۔
ذرائع کے مطابق آئی ایم ایف نے بجلی کی منافع بخش تقسیم کار کمپنیوں کی فوری فروخت کی تجویز دے دی اور بجلی کی نقصان میں چلنے والی تقسیم کار کمپنیوں کو صوبوں کے حوالے کرنے کی تجویز بھی دی ہے۔
بجلی کی سرکاری کمپنیوں کے آڈٹ کے لیے نیپرا آڈیٹر جنرل کو معاونت فراہم کرے گا جبکہ آئی ایم ایف کی جانب سے سرکاری شعبے میں بجلی کارخانوں کی فوری نجکاری کا بھی دباؤ ہے۔
بجلی کی نقصان میں چلنے والی تقسیم کار کمپنیوں کو صوبوں کے حوالے کرنے کی تجویز بھی زیر غور ہے۔