شمالی وزیرستان: سکیورٹی فورسز کا آپریشن، دہشتگرد ہلاک، جنوبی وزیرستان میں حوالدار شہید

میرانشاہ: (ویب ڈیسک) سکیورٹی فورسز نے خفیہ اطلاع پر آپریشن کرتے ہوئے دہشتگرد کو ہلاک کر دیا جبکہ جنوبی وزیرستان میں فوجی قافلے کی گاڑی دیسی ساختہ بارودی سرنگ سے ٹکرا گئی ، 39 سالہ حوالدار شہید ہو گیا۔
پاک فوج کے شعبہ تعلقات عامہ ( آئی ایس پی آر) کی طرف سے جاری کردہ بیان کے مطابق خیبرپختونخوا کے ضلع شمالی وزیرستان کے علاقے میر علی میں سیکیورٹی فورسز نے خفیہ اطلاع پر آپریشن کیا۔
بیان کے مطابق فائرنگ کے تبادلے میں ایک دہشت گرد ہلاک ہوا، ہلاک ہونے والے دہشت گرد کی شناخت محمد الطاف کے نام سے ہوئی ہے۔ مارے جانے والا دہشتگرد سکیورٹی فورسز کے خلاف کارروائیوں میں ملوث تھا، ہلاک دہشت گرد سے اسلحہ اور گولہ بارود بھی برآمد ہوا۔
اُدھر جنوبی وزیرستان میں فوجی قافلے کی گاڑی دیسی ساختہ بارودی سرنگ سے ٹکرا گئی، یہ واقعہ مکین میں پیش آیا۔،آئی ایس پی آر کے مطابق حادثےمیں 39سالہ حوالدار سانور شہید ہو گیا، علاقےمیں ممکنہ دہشتگردوں کےخاتمےکیلئےکلیئرنس آپریشن جاری ہے۔