ٹیسٹ رینکنگ میں اظہرعلی کی7ویں پوزیشن برقرار

دبئی(نیوزایجنسیاں) آئی سی سی کی جانب سے جاری کی گئی نئی ٹیسٹ رینکنگ الیسٹرکک ٹاپ 10 میں شامل ہوگئے ہیں۔آئی سی سی نے انگلینڈ اور ویسٹ انڈیز کے مابین ڈے نائٹ ٹیسٹ میچ کے بعد نئی ٹیسٹ رینکنگ جاری کردی ہے۔ بیٹنگ میں پہلی پانچ پوزیشنز میں تبدیلی نہیں آئی۔ اسٹیو اسمتھ بدستور سرفہرست ہیں تاہم دوسرے نمبر پر موجود جوئے روٹ نے پوائنٹس کا فرق مزید کم کر لیا ہے۔ کین ولیمسن تیسرے، چتیشور پجارا چوتھے اور ویرات کوہلی پانچویں نمبر پر موجود ہیں۔ انگلش اوپنر الیسٹر کک نے 6 درجے ترقی کے ساتھ چھٹی پوزیشن پر قبضہ کرلیا ہے۔ پاکستانی اوپنر اظہر علی بدستور ساتویں پوزیشن پر موجود ہیں۔ جونی بیئراسٹو 6 درجے تنزلی کے ساتھ ٹاپ ٹین سے باہر ہو گئے ہیں۔بولرز میں ٹاپ 10 رینکنگ میں کوئی تبدیلی نہیں آئی۔ رویندرا جدیجا بدستور سرفہرست ہیں تاہم جیمز اینڈرسن نے ان کیلیے خطرے کی گھنٹی بجا دی ہے، انگلش پیسر صرف 9 پوائنٹس کے فرق سے دوسری پوزیشن سنبھالے ہوئے ہیں۔ پاکستان کے یاسر شاہ 14 ویں پوزیشن پر موجود ہیں۔آل راﺅنڈرز کی ٹاپ 5 پوزیشنز بھی برقرار ہیں۔ شیکب الحسن نمبر ون، رویندرا جدیجا دوسرے، روی چندرن ایشون تیسرے، معین علی چوتھے اور بین اسٹوکس پانچویں نمبر پر موجود ہیں۔آسٹریلیا کو ٹیم رینکنگ میں چوتھی پوزیشن بچانے کیلیے بنگلا دیش کے خلاف ٹیسٹ سیریز میں لازمی فتح درکار ہے۔ میزبان ٹیم کی جانب سے وائٹ واش پر کینگروز ٹیم چھٹے نمبر پر چلی جائے گی جب کہ بنگلا دیش کو 0-1 سے فتح پر بھی ایک درجہ تنزلی کا سامنا کرنا ہوگا۔