امریکا میں مسافر بس پر فائرنگ میں1 ہلاک 4 زخمی؛ ملزم برہنہ حالت میں گرفتار

لاس اینجلس: (ویب ڈیسک) امریکی ریاست کیلی فورنیا میں مسلح شخص نے بس میں فائرنگ کردی جس کے نتیجے میں ایک شخص ہلاک اور حاملہ خاتون سمیت 4 افراد شدید زخمی ہوگئے جب کہ گرفتاری سے بچنے کے لیے ملزم نے اپنے کپڑے اتار دیئے۔
امریکی میڈیا کے مطابق کیلی فورنیا میں مسافر بس میں موجود 21 سالہ مسلح شخص نے اچانک زور سے کہا کہ لاس اینجلس ایک خطرناک شہر ہے اس کے بعد ایک مسافر کو خفیہ اہلکار قرار دیکر جھگڑا شروع کردیا۔
جیسے ہی بس ایک اسٹور پر رکی مسلح شخص نے مسافروں پر اندھا دھند فائرنگ کر دی اور پیدل بھاگتے ہوئے شاپنگ مال میں گھس گیا جہاں ایک اور شخص سے جھگڑنے لگا۔
کیلی فورنیا پولیس ملزم کے تعاقب میں شاپنگ مال تک پہنچ گئی، پولیس کو دیکھتے ہی گرفتاری سے بچنے کے لیے ملزم نے اپنے کپڑے اتار دیئے تاہم پولیس اہلکار ملزم کو برہنہ حالت میں تھانے لے گئی۔
فائرنگ میں ایک شخص ہلاک اور 4 زخمی ہوگئے، زخمیوں میں ایک حاملہ خاتون بھی شامل ہیں جنھیں اسپتال منتقل کردیا گیا ہے۔ ملزم کی شناخت اساہدی کولمین کے نام سے ہوئی ہے۔
پولیس کے مطابق 21 سالہ ملزم بچپن سے جرائم کا عادی ہے جس کا کریمنل ریکارڈ موجود ہے. 2020 اور 2021 میں ملزم نے قید بھی کاٹی ہے۔ ملزم کے جرائم میں ملوث ہونے پر اسلحہ خریدنے کی پابندی بھی تھی۔
پولیس کا کہنا ہے کہ ملزم نے پابندی کے باوجود اسلحہ کیسے خریدا اس کی تحقیقات کی جا رہی ہیں۔ فائرنگ کی وجہ کا تعین نہیں ہوسکا ہے تاہم پولیس کے بقول ملزم نشے میں دھت تھا اور ذہنی امراض کا شکار بھی لگتا ہے۔