اومی کرون کیسز: بھارت کی ایک اور ریاست میں رات کا کرفیو نافذ

بھارتی ریاست اترپردیش میں بھی اومی کرون کے کیسز سامنے آنے پر نائٹ کرفیو نافذ کردیا گیا۔
بھارتی میڈیا کے مطابق ریاست اترپردیش میں کورونا کے جنوبی افریقی ویرینٹ اومی کرون کے کیسز سامنے آنے پر نائٹ کرفیو سمیت دیگر پابندیاں عائد کی گئی ہیں۔
رپورٹس کےمطابق ریاستی حکام نے شادی کی تقریبات میں زیادہ سے زیادہ 200 افراد کو مکمل حفاظتی اقدامات کے ساتھ شرکت کی اجازت دی ہے جب کہ تمام دکانداروں کو بغیر ماسک کے آنے والے گاہکوں کو سودا سلف نہ دینے کی ہدایت کی گئی ہے۔
ریاست اترپردیش میں رات 11 بجے سے صبح 5 بجے تک مکمل کرفیو نافذ ہوگا جس کا اطلاق 25 دسمبر سے ہوگا۔
حکام نے بیرون ملک سے اترپردیش آنے والے افراد کو ہر صورت کورونا ٹیسٹ کرانے کا حکم دیا ہے جب کہ ریلوے اور بس اسٹیشنوں پر بھی اس حوالے سے احکامات دیے گئے ہیں۔
اس سے قبل ریاست مدھیا پردیش کے وزیراعلیٰ نے بھی اومی کرون کیسز سامنے آنے پر ریاست میں فوری طور پر نائٹ کرفیو نافذ کرنے کا اعلان کیا تھا جس کا دورانیہ بھی 11 سے صبح 5 تک رکھا گیا ہے۔
بھارتی میڈیا کے مطابق جمعرات کے روزکووڈ 19 کے 31 کیسز رپورٹ ہوئے جن کی اپریل اور مئی میں تعداد ہزاروں میں تھی جب کہ جمعرات کے روز بھارت بھر میں کورونا کے مجموعی طور پر 7500 کیسز سامنے آئے۔
بھارتی میڈیا کا بتانا ہےکہ ملک میں جمعہ کی صبح تک اومی کرون کے کُل کیسز کی تعداد 358 تھی جن میں ریاست مہاراشٹرا میں 88، دہلی 67، تلنگانا 38، تامل ناڈو 34، کرناٹکا 31 اور گجرات میں 30 کیسز رپورٹ ہوئے ہیں جب کہ کیرالا، راجستھان، ہریانہ، اڑیسہ، بنگال، آندھیرا پردیش، اتر پردیش، چندی گڑھ، لداخ اور اترکھنڈ میں بھی اومی کرون کے کیسز سامنے آچکے ہیں۔