فائزر ویکسین کی 15 لاکھ سے زائد خوراک پاکستان پہنچا دی گئیں۔
فائزر ویکسین کی 15 لاکھ 57 ہزار سے زیادہ خوراک پاکستان پہنچا دی گئی ، یہ کھیپ کوویکس پروگرام کے تحت دی گئی ہے۔
امریکی سفارت خانے کے مطابق امریکا کی طرف سے کوویکس کے ذریعے عطیہ کردہ فائزر ویکسین پاکستان پہنچا دی گئیں۔
امریکی سفارت خانہ نے اپنے بیان میں کہا کہ ہمیں پاکستان کے لوگوں کو ویکسین دینے میں اپنا کردار ادا کرنے پر فخر ہے۔
امریکی سفارت خانہ نے مزید کہا کہ مجموعی طور پر ڈھائی کروڑ کورونا ویکسین کی خوراکیں پاکستان کو عطیہ کرچکے ہیں جبکہ ویکسین غیر مشروط طور پر پاکستان کو عطیہ کی گئی۔
واضح رہےکہ ملک بھر میں کورونا مثبت کیسز کی شرح 0.73 فیصد ہو گئی ہے۔
نیشنل کمانڈ اینڈ آپریشن سینٹر (این سی اوسی) کے جاری کردہ اعداد و شمارکے مطابق گزشتہ 24 گھنٹوں کے دوران کورونا کے مزید 240 نئے کیسز کی تصدیق ہوئی ہے جبکہ گزشتہ 24 گھنٹوں کے دوران کورونا سے مزید 06 افراد انتقال کر گئے ہیں۔
ملک میں کورونا سے ہلاکتوں کی تعداد 28606 ہو گئی اور مجموعی کیسز 12 لاکھ 79 ہزار 636 تک جا پہنچے ہیں جب کہ فعال کیسز کی تعداد 22855 ہے۔
این سی اوسی کے مطابق 24 گھنٹوں کےدوران32 ہزار 466 کورونا ٹیسٹ کیےگئے۔
اس کے علاوہ 24 گھنٹوں کے دوران ملک بھر میں 298 مریض کورونا سے صحتیاب بھی ہوئے ہیں جس کے بعد مجموعی طور پر صحتیاب ہونے والوں کی تعداد 12 لاکھ 28 ہزار 473 ہو گئی ہے۔
