تیسرا ٹی20 بارش کی نذر، پاکستان کی عالمی نمبر ایک پوزیشن برقرار

لاہور (ویب ڈیسک)پاکستان اور بنگلہ دیش کے درمیان ٹی20 سیریز کا تیسرا میچ مستقل بارش کے باعث منسوخ کردیا گیا اور ٹی20 سیریز میں 0-2 کی فتح کی بدولت پاکستان نے عالمی نمبر ایک پوزیشن بھی برقرار رکھی۔بنگلہ دیش کے خلاف ٹی20 سیریز کا تیسرا میچ بھی لاہور کے قذافی اسٹیڈیم میں کھیلا جانا تھا لیکن لاہور میں صبح سے جاری مسلسل بارش کے سبب میچ کا ٹاس بھی ممکن نہ ہو سکا۔اس دوران امپائرز نے کئی مرتبہ گراو¿نڈ کا رخ کیا لیکن تواتر کے ساتھ جاری بارش کے باعث میچ شروع ہونے کا امکان پیدا نہ ہو سکا۔بالآخر بارش نہ رکنے کے بعد امپائرز نے دونوں ٹیموں کے کپتان اور میچ ریفری سے مشاورت کے بعد میچ منسوخ کرنے کا اعلان کردیا۔قومی ٹیم کے کپتان بابر اعظم کو سیریز کا بہترین کھلاڑی قرار دیا گیا جنہوں نے بطور کپتان پہلی سیریز جیتنے کا اعزاز بھی حاصل کر لیا۔یاد رہے کہ پاکستان نے سیریز کے پہلے میچ میں شعیب ملک کی عمدہ بیٹنگ کی بدولت بنگلہ دیش کو شکست دی تھی جبکہ دوسرے میچ میں بابر اعظم اور محمد حفیظ کی عمدہ بیٹنگ کی بدولت یکطرفہ مقابلے کے بعد کامیابی حاصل کر کے سیریز بھی اپنے نام کر لی تھی۔میچ بارش کی نذر ہونے اور سیریز میں 0-2 کی فتح کی بدولت پاکستان کی ٹیم عالمی نمبر ایک پوزیشن بھی برقرار رکھنے میں کامیاب رہی۔عالمی درجہ بندی میں پاکستان 270 پوائنٹس کے ساتھ پہلے، آسٹریلیا 269 پوائنٹس کے ساتھ دوسرے، انگلینڈ تیسرے، جنوبی افریقہ چوتھے اور بھارت پانچویں نمبر پر موجود ہے۔دوسری جانب پاکستان کرکٹ بورڈ نے بارش کی نذر ہونے والے تیسرے ٹی20 میچوں میں شائقین کے ٹکٹ کی رقم واپس کرنے کا فیصلہ کیا ہے۔پی سی بی نے تیسرے ٹی20 میچ کی ٹکٹ فیس واپس کرنے کا فیصلہ کیا اور شائقین کرکٹ کوریئر سینٹرز پر ٹکٹس واپس کر کے قیمت واپس وصول کر سکیں گے۔