آئندہ جمعرات کو ڈاکٹرز کا وزیراعلیٰ ہاﺅس کیجانب مارچ اور دھرنا ہو گا

لاہور (جنرل رپورٹر) صوبائی دارلحکومت سمیت پنجاب بھر میں مریض گزشتہ روز بھی دربدر کی ٹھوکریں کھاتے رہے۔ مریض پرائیویٹ ہسپتالوں میں مہنگا علاج کرانے پرمجبور ہوگئے، ینگ ڈاکٹرز کاایم ٹی آئی ایکٹ کیخلاف احتجاج اور ہڑتال 11 ویں روز بھی جاری رہی۔ سرکاری ہسپتالوں کی او پی ڈیز بدستوربند رہیں ،مریضوں اور لواحقین کو شدید پریشانی کا سامنا کرنا پڑا۔ صوبہ بھرکے تمام بڑے ٹیچنگ ہسپتالوں کی او پی ڈیزمیں ڈاکٹرز اور پیرا میڈیکس نے آﺅٹ ڈور کا بائیکاٹ کیا۔گرینڈ ہیلتھ الائنس کے چیئرمین ڈاکٹر سلمان حسیب، ڈاکٹرعمر شفیق، ملک منیر احمد، شعیب انور چوہدری، حافظ دلاور حسین، طلعت سجاد، عاشق گجر نے گزشتہ روز پنجاب انسٹی آف کارڈیالوجی میں پر یس کانفرنس کے دوران کیا۔ انہوں نے کہا کہ ایم ٹی آئی ایکٹ قوم سے ناانصافی ہے۔ حکومت نے نوٹس نہ لیا تو سمجھیں گے وزیراعلی کی کوئی حیثیت نہیں۔ ہمارا حکومت سے کوئی تنازعہ نہیں۔ ہم چاہتے ہیں مریضوں کی خدمت کریں۔ وزیراعظم عمران خان سے لوگوں کی بہت امیدیں ہیں۔ یاسمین راشد وزیراعظم کو غلط معلومات دے رہی ہیں۔ ہم چاہتے ہیں مسیحا واپس ہسپتالوں میں جائیں اور مریضوں کا علاج کریں۔ اپوزیشن ہمیں عمران خان کے ووٹر ہونے کاطعنہ دیتی ہے۔ تمام ہسپتالوں میں اوٹ ڈور کی بندش جاری رہے گی۔ آئندہ جمعرات کو وزیراعلی ہاوس کی جانب مارچ کیا جائے گا اور وہاں ہزاروں لوگ دھرنا دیں گے۔ پنجاب بھر سے ڈاکٹرز، نرسز اور پیرامیڈیکس لاہور آئیں گے۔ آئی ایم ایف ریفارمز کیے جارہے ہیں، ہیلتھ ریفارمز نہیں ہورہے، پرچی کاٹنے والے نہیں ہوگا، سٹریچر والا نہیں ہوگا، ٹیکا لگانے والا نہیں ہوگا تو ہسپتال نہیں چلیں گے۔