ن لیگ پر نواز شریف گروپ کا قبضہ ، شہباز شریف کے حامی آﺅٹ

لاہور (تجزیہ نگار) مسلم لیگ ن میں تنظیم نو کے بعد پارٹی کے اندر تین بڑے عہدوں پر نوازشریف کے اہم اور قریبی ساتھی قابض ہو گئے ہیں اور شہباز شریف کے حمایتی پیچھے چلے گئے۔ گزشتہ دنوں شہباز شریف کی جگہ پبلک اکاﺅنٹس کمیٹی کا چیئرمین رانا تنویر حسین کو بنا دیا جبکہ خواجہ آصف کو پارلیمانی لیڈر بنا دیا گیا اور اسی طرح شاہد خاقان عباسی کو سینئر نائب صدر اور احسن اقبال کو سیکرٹری جنرل بنایا گیا ہے جس پر سینئر رہنماﺅں راجہ ظفر الحق اور خواجہ سعد رفیق نے دبے لفظوں میں ناراضی کا اظہار بھی کیا۔ ذرائع کا کہنا ہے کہ شاہد خاقان عباسی کو ن لیگ کا سینئر نائب صدر اس لئے بنایا گیا ہے کہ شہباز شریف کے وطن واپس نہ آنے پر شاہد خاقان عباسی کو ن لیگ کے قائم مقام صدر کے ساھ اپوزیشن لیڈر بھی بنا دیا جائے گا اس سے پہلے بھی نوازشریف کے گروپ نے نوازشریف اور چودھری نثار کے درمیان غلط فہمیاں پیدا کر کے شہباز شریف کے سب سے برے حامی چودھری نثار کی پارٹی سے چھٹی کرا دی تھی۔ واضح رہے کہ ماضی میں جب شہباز شریف پنجاب کے وزیراعلیٰ تھے اور خواجہ آصف وزیر پانی و بجلی تھے تو اس وقت دونوں کے درمیان بجلی گھروں کی تعمیر پر سرد جنگ شروع ہو گئی تھی جس پر نوازشریف نے اپنا وزن خواجہ آصف کے پلڑے میں ڈالا تھا۔ اب ایک بار پھر پارٹی کی تنظیم نو کے نام پر نوازشریف کا گروپ پارٹی کا مکمل طور پر قابض ہو گیا جبکہ شہباز شریف کا دھڑا پیچھے چلا گیا۔