” خبریں “ کسان میلہ کی تجاویز کوزرعی پالیسی کا حصہ بنوانے کی کوشش کرینگے : ضیا شاہد

ملتان(رپورٹنگ ٹیم) ”خبریں“ گروپ آف نیوز پیپرز کے چیف ایڈیٹر جناب ضیا شاہد نے کہاہے کہ ”خبریں“ کسان میلے میں ہونیوالے زرعی سیمینار میں دی گئی تجاویز، مطالبات اورقراردادوں کا ورکنگ پیپر بناکرشائع کیاجائیگا۔”خبریں“ کسان میلے کی 3روزہ تقریبات میں زراعت کی ترقی کےلئے حکومت پنجاب اور کابینہ کو یادداشت بھی پیش کی جائے گی۔ کیونکہ زراعت کی ترقی سمیت تمام معاملات اب صوبائی حکومت سے متعلق ہیں۔ قاسم باغ سٹیڈیم میں ہونیوالے پاکستان کے سب سے بڑے کسان میلے کے دوسرے روز زرعی سیمینار سے خطاب کرتے ہوئے جناب ضیا شاہد نے کہاکہ کسان میلے میں کسانوں ،ماہرین سمیت تمام سٹیک ہولڈرز کی تجاویزارباب اختیار اورحکومت تک پہنچائی جائیں گی۔ سیمینار میں ہونیوالی تقریریں، نشستاً گفتاً اور برخواستاً تک نہیں ہوں گی۔زراعت کی بہتری، کسان کی ترقی اور فلاح کےلئے دی گئی تمام تجاویز کو زرعی پالیسی کاحصہ بنوانے کی بھرپورکوشش کی جائے گی۔ جناب ضیا شاہد نے کہاکہ گورنرپنجاب چودھری محمدسرور زراعت کوترقی دینے میں خصوصی دلچسپی رکھتے ہیں اور میلے کے آخری روز (آج) شرکت کریں گے۔ انہوں نے کہاکہ زراعت کے صوبائی وزیر ملک نعمان احمد لنگڑیال بھی میلے میں شریک ہوکر کسانوں کے مسائل سنیں گے۔ جناب ضیا شاہد نے خطاب کرتے ہوئے کہا کہ کسان میلے میں زرعی سیمینار کے زیادہ سے زیادہ نکات پر عملدرآمدکرایاجائے گا۔ ”خبریں“ گروپ کسان کی فلاح وبہبود کےلئے ہمیشہ آواز بنے گا۔ جناب ضیا شاہد نے زرعی سیمینار اورمیلے میں آنیوالے شرکاءکاشکریہ اداکیا۔
ضیا شاہد