شکست پر بہانے ،وقار نے مورگن کو کھری کھری سنادیں

لاہور(آئی این پی) قومی ٹیم کے سابق ہیڈ کوچ وقار یونس نے پاکستان کیخلاف چیمپئنز ٹرافی میں شکست کے بعد بہانے بنانے والے برطانوی ٹیم کے کپتان این مورگن کو کھری کھری سنا دیں۔تفصیلات کے مطابق این مورگن نے پاکستان کے ہاتھوں شکست کا ملبہ وکٹ پر ڈالتے ہوئے کہا تھا کہ یہ پچ استعمال شدہ تھی اور سری لنکا اور پاکستان کا میچ بھی اسی پر ہوا تھا، پاکستان کو کارڈف گرانڈ کی کنڈیشنز کا علم تھا لیکن ہم ان کنڈیشنز کو سمجھ نہیں سکے ، اس لئے میچ میں مقابلہ کرنے سے قاصر رہے۔وقار یونس نے مورگن کے اس موقف کو یکسر مسترد کرتے ہوئے سماجی رابطے کی ویب سائٹ ٹویٹر پر اپنے بیان میں کہا کہ استعمال شدہ پچ سے متعلق جھوٹے بہانے مت بنا۔ پاکستانی ٹیم نے ایمانداری سے کھیلتے ہوئے عمدہ کھیل کے ذریعے تم لوگوں کی پٹائی کی ہے۔