اگر کسی ایشو پر پارٹیاں متفق ہوئیں تو بڑی پیشرفت ہو گی: چودھری منظور، شہباز شریف کے ریمانڈ میں 90روز تک کی توسیع ہو سکتی ہے: شاہ خاور ، سابق وزیر اعلیٰ پنجاب نے میرٹ سے ہٹ کر بھرتیاں کرائیں: مرتضیٰ ستی کی چینل ۵ کے پروگرام ” نیوز ایٹ 7“ میں گفتگو

لاہور(مانیٹرنگ ڈ یسک) تحریک انصاف کے رہنماءمرتضیٰ ستی نے کہا ہے کہ سابق وزیر اعلی پنجاب شہباز شریف نے میرٹ سے ہٹ کر پولیس اور بیوروکریسی میں بھرتیاں کرائیں۔ پنجاب میں پولیس کی گورننس اچھی نہیں پولیس کو کوئی پوچھنے والا نہیں تھا۔چینل فائیو کے پروگرام نیوز ایٹ 7میں گفتگو کرتے ہوئے انہوں نے کہا کہ وزیراعظم عمران خان قوم کو بڑی امیدیں ہیں عمران خان ہی ملک کودرست سمت میں لے کر جا سکتے ہیں کیونکہ سب جانتے ہیں وہ ایماندار شخص ہیں۔عمران خان کا عوام نے اسی لئے ساتھ دیا کہ وہ کرپشن کے خلاف اور اس کے خاتمے کے لئے پرعزم ہیں۔شہباز شریف کو پبلک اکاﺅنٹس کمیٹی (پی اے سی) کا چیئرمین بنانا ایسے ہی ہو گا جیسے دودھ کی رکھوالی پر بلے کو بٹھا دیا جائے۔ن لیگ کرپشن کے بوجھ تلے دبی ہوئی ہے۔ پیپلز پارٹی کے رہنماءچوہدری منظور احمد نے کہا کہ اگر کسی ایشو پر تمام جماعتیں متفق ہوتی ہیں تو یہ بڑی پیشرفت ہو گی۔صرف کسی پارٹی کے لوگ اکٹھے ہوں تو کوئی فرق نہیں پڑتا۔جو بھی ہو فیصلے عوامی مفاد کو مدنظر رکھ کر کئے جائیں عوام صرف ریلیف چاہتے ہیں جس کا حکومت نے وعدہ بھی کیا تھا۔انہوں نے کہا کہ پیپلز پارٹی کے دور میں عوام کو بھرپور ریلیف دیا گیا ہم نے ہمیشہ عوام کی خدمت کی ۔ماہر قانون شاہ خاور نے کہا کہ شہباز شریف کے ریمانڈ میں90روز تک کی توسیع ہوسکتی ہے لیکن اگر تفتیش جلد مکمل ہو جائے تو بہتر ہو گا۔جب بھی ریمانڈ میں توسیع کی درخواست کی جاتی ہے تو نیب اس کی وجہ بھی بتاتاہے کہ مزید ریمانڈ کیوں دیا جائے۔