نیب کا شہباز شریف کو دوسرے مقدمات میں گرفتار کرنیکا فیصلہ

لاہور(خبر نگار) آشیانہ ہاو¿سنگ سکینڈل میں نیب کی زیر حراست مسلم لیگ ن کے صدر اور اپوزیشن لیڈر قومی اسمبلی شہباز شریف مزید مشکل میں پڑ گئے ہیں۔ تفصیلات کے مطابق نیب نے آمدن سے زائد اثاثوں کے کیس میں بھی شہباز شریف کی گرفتاری ڈال دی۔ذرائع کے مطابق نیب کی جانب سے 29 اکتوبر کو احتساب عدالت میں شہباز شریف کے مزیدریمانڈ کی استدعا کی جائے گی۔نیب نے اثاثوں سے متعلق مزید معلومات کے لیے شہباز شریف کے صاحبزادوں حمزہ شہباز اور سلمان شہباز کو دوبارہ طلب کر رکھا ہے۔ شہباز شریف پر آمدن سے زائد اثاثے بنانے کا الزام عائد ہے۔یاد رہے کہ اس سے قبل بھی نیب لاہور نے سلمان شہباز کو پوچھ گچھ کے لیے طلب کیا تھا۔ دوسری جانب ایف بی آر (فیڈرل بورڈ آف ریونیو) نے مسلم لیگ ن کے صدر شہباز شریف کے صاحبزادوں حمزہ شہباز اور سلمان شہباز کی تفصیلات نیب میں جمع کروا دی ہیں۔ذرائع کے مطابق نیب نے حمزہ شہباز اور سلمان شہباز کے خلاف آمدن سے زائد اثاثہ جات بنانے کے حوالے سے تحقیقات کا آغاز کر رکھا ہے اور اس ضمن میں ایف بی آر سے حمزہ شہباز اور سلمان شہباز کے کاروباروں کی 20 سالہ تفصیلات طلب کی گئی تھیں۔ذرائع کے مطابق شہباز شریف کو داتا علی ہجویری کے عرس کی تقریبات کی وجہ سے مقامی تعطیل کے باعث 30 کی بجائے 29 اکتوبر کو عدالت میں پیش کرنے پر مشاورت ہوئی۔ نجی ٹی وی کے مطابق افسران کا کہنا ہے کہ شہباز شریف کے احکامات پر ہی ٹھیکے آگے دینے کے فیصلے ہوئے، لطیف سنز کا ٹھیکہ منسوخ کرنے کیلئے ہنگامی اجلاس بلایا گیا۔شہباز شریف اور فواد حسن فواد پر قوانین کے برعکس اقدامات کرنے کا الزام ہے۔ نیب ذرائع کے مطابق شہباز شریف نے لطیف سنز کمپنی سے غیرقانونی طور پر مالی فوائد حاصل کئے، 21اکتوبر 2014ءکو آشیانہ اقبال منصوبہ ایل ڈی اے کو منتقل کرنے کا حکم دیا گیا۔ ترجمان نیب نے بتایا کہ آشیانہ اقبال ہاسنگ اسکیم کے بعد شہبازشریف سے دیگر کیسز پر بھی سوالات شروع کردیئے ہیں اور ان کے خلاف آمدن سے زائد اثاثوں کی تحقیقات کا آغاز کردیا گیا ہے۔ شہبازشریف کے خلاف آمدن سے زائد اثاثوں کی تحقیقات آشیانہ اقبال کیس کے تناظر میں شروع کی ہیں جب کہ انہوں نے بہت سے معاملات پر لاعلمی کا اظہار بھی کیا ہے۔ احتساب عدالت سے شہبازشریف کے مزید ریمانڈ کے لیے دیگر کیسز کے نکات کو بھی استعمال کرنے کا منصوبہ بنایا گیا ہے۔ دوسری جانب نیب لاہورکا کہنا ہے کہ شہبازشریف کی آمدن سے زائد اثاثہ جات کے کیس میں گرفتاری کی خبرحقائق پرمبنی نہیں تاہم نیب حکام کی جانب سے ملزم کے مبینہ طورپرآمدن سے زائد اثاثہ جات کے کیس میں انکوائری جاری ہے۔گزشتہ 20 دن سے قید شہبازشریف نے بہت سے معاملات پرنیب سے لاعلمی کا اظہارکیا ہے جب کہ شہبازشریف نیب کی ٹیم کے باربارایک جیسے سوالات کرنے سے بیزار ہوگئے ہیں۔اس سے قبل نیب لاہونے شہباز شریف کے اثاثوں کے بارے میں پوچھ گچھ کیلئے ان کے بیٹے سلمان شہباز کو بلایا تھا جب کہ مزید معلومات حاصل کرنے کیلئے دونوں بھائیوں کو دوبارہ طلب کررکھا ہے۔