لاہور ہائیکورٹ نے شہباز شریف کی گرفتاری کے خلاف درخواست خارج کر دی

لاہور (ویب ڈیسک ) لاہور ہائیکورٹ نے شہباز شریف کی گرفتاری کے خلاف درخواست خارج کر دی۔ تفصیلات کے مطابق لاہور ہائیکورٹ نے مسلم لیگ ن کے صدر اور اپوزیشن لیڈر قومی اسمبلی کی گرفتاری کے خلاف درخواست پر فیصلہ محفوظ کیا تھا جسے اب خارج کر دیا گیا ہے۔ عدالت نے درخواست کو ناقابل سماعت قرار دے کر خارج کیا۔ یاد رہے کہ اپوزیشن لیڈر قومی اسمبلی اور مسلم لیگ ن کے صدر شہباز شریف کی گرفتاری کے خلاف لاہور ہائیکورٹ میں درخواست دائر کی گئی تھی۔پاکستان لائرز فاﺅنڈیشن نے اے کے ڈوگر ایڈووکیٹ نے شہباز شریف کی گرفتاری کو لاہور ہائیکورٹ میں چیلنج کیا۔ درخواست میں موقف اختیار کیا گیا کہ انکوائری مکمل اورجرم ثابت ہونے سے قبل ہی نیب نے شہباز شریف کو گرفتار کر لیا۔اس طرح سے ملزم کو گرفتار کرنا آئین کے آرٹیکل 10 کی خلاف ورزی ہے۔اے کے ڈوگر ایڈووکیٹ نے لاہور ہائیکورٹ میں دائر درخواست کہا کہ آئین کے تحت فری اینڈ فئیر ٹرائل ہر ملزم کا بنیادی حق ہے لیکن چیئرمین نیب نے شہباز شریف کو کیس میں فری اور فئیر ٹرائل کا حق نہیں دیا۔درخواست گزار تنظیم کے وکیل کے مطابق چیئرمین نیب کا دوران انکوائری کسی بھی ملزم کو گرفتار کرنے کا اختیار آئین سے متصادم ہے۔ درخواست میں استدعا کی گئی کہ شہباز شریف کی گرفتاری آئین سے متصادم ہونے پر چیئرمین نیب کا شہباز شریف کی گرفتاری کا حکم کالعدم قرار دیا جائے۔ شہباز شریف کی ضمانت منظور کر کے ان کی رہائی کا حکم دیا جائے۔