بھارت کر ہرانے کا آزمودہ طریقہ ، یونس نے بتا دیا

کراچی (سپورٹس ڈیسک)پاکستان کے سابق کپتان یونس خان نے چیمپیئنز ٹرافی میں ہندوستان کے خلاف میچ میں پاکستانی ٹیم کیلئے نیک خواہشات کا اظہار کرتے ہوئے کہا کہ پاکستانی ٹیم ایونٹ کے سیمی فائنل میں پہنچنے کی مکمل صلاحیت رکھتی ہے۔کراچی میں ہل پارک رمضان کرکٹ ٹورنامنٹ کا آغاز ہوگیا اور ٹورنامنٹ کی افتتاحی تقریب کے مہمان خصوصی سابق کپتان یونس خان نے اس موقع پر گفتگو کرتے ہوئے کہا کہ پاکستانی ٹیم میں ہندوستان کو ہرانے کی بھرپور صلاحیت موجود ہے اور ہم ماضی میں بھی انہیں چیمپیئنز ٹرافی میں شکست دے چکے ہیں۔انہوں نے کہا کہ انگلینڈ میں وکٹیں بیٹنگ کیلئے انتہائی سازگار ہیں اور چیمپیئنز ٹرافی میں حتیٰ کہ 400 رنز کے ہدف کا بھی باآسانی تعاقب کیا جا سکتا ہے۔اس موقع پر سابق کپتان نے کہا کہ بیٹنگ اور باو¿لنگ کے ساتھ ساتھ پاکستانی ٹیم کو فیلڈنگ پر بھی بھرپور توجہ دینی چاہیے۔ جدید کرکٹ میں ون ڈے اور ٹی20 میچ جیتنے کیلئے فیلڈنگ بہت اہم ہے اور پاکستانی ٹیم اس پر بھرپور توجہ دینا ہو گی۔انہوں نے امید ظاہر کی کہ سرفراز کی زیر قیادت پاکستانی ٹیم مستقبل میں کامیابی سے ہمکنار ہو گی اور نئے کپتان ٹیم کو آگے لے کر جائیں گے۔ یونس کا کہنا تھا کہ یہ سرفراز کے پاس ٹیم کی قیادت اور اسے آگے لے جانے کا بہترین موقع ہے اور پاکستانی ٹیم کی کارکردگی کا بہت حد تک انحصار اس بات پر ہو گا کہ وہ کس طرح ٹیم کی قیادت کرتے ہیں۔انہوں نے ٹیم کا مورال بلند رکھنے کیلئے تمام کھلاڑیوں کو سپورٹ کرنے کی ضرورت پر بھی زور دیا۔وارم اپ میچز کے بعد پاکستان ایونٹ میں اپنا پہلا روایتی حریف ہندوستان کے خلاف کھیلے گا۔پاکستان کرکٹ ٹیم کے سابق کپتان یونس خان نے قومی ٹیم کے کھلاڑیوں کو مشورہ دیتے ہوئے کہا کہ کھلاڑیوں کو روزہ ضرور رکھنا چاہئے،رمضان المبارک میں میچز کھیلنا مشکل ہوجاتا ہے۔