بنگلہ دیش بھی بھارت کے نقش قدم پر چل پڑا

ڈھاکا(آئی این پی) بنگلادیش کر کٹ بورڈ سیریز کھیلنے کے پاکستانی انکار پر آگ بگولہ ہوگیا، بنگلہ دیشی بورڈ نے اپنی جونیئر ٹیمیں پاکستان بھیجنے سے صاف انکار کردیا ۔پاکستان نے جولائی میں شیڈول ٹورکیلئے اپنی سینئر ٹیم بنگلہ دیش بھیجنے سے انکار کیا تھا، اس کے جواب میں اب بی سی بی نے اپنے کسی بھی لیول کی ٹیم کے پاکستانی ٹور کو خارج از امکان قرار دیا ہے۔دوسری جانب بی سی بی کے صدر نظم الحسن نے کہاکہ اپریل میں دونوں بورڈز کے درمیان ہائی پرفارمنس یا انڈر 19 ٹیم پاکستان بھیجنے کے بارے میں بات چیت ہوئی تھی، مگر جب سے ہمیں میڈیا کے ذریعے یہ معلوم ہوا کہ پاکستان بورڈ اپنی سینئر ٹیم جولائی میں نہیں بھیج رہا تب سے ہماری ان کے ساتھ کوئی بات نہیں ہوئی، ہماری قومی ٹیم کے پاکستان جانے کا تو سوال ہی پیدا نہیں ہوتا، ہائی پرفارمنس یا انڈر 19 شاید وہاں کا دورہ کرتی لیکن اب ہمارا پی سی بی کے ساتھ کوئی رابطہ نہیں ہے،انھوں نے سیریز منسوخ کردی لہذا اب ہم جونیئر سائیڈز بھی نہیں بھیجیں گے، انکیلئے ہم نے نیوزی لینڈ اور انگلینڈ سے پروگرم تشکیل دیا ہے،کچھ اور ممالک کی جونیئر سائیڈز بھی بنگلہ دیش کا دورہ کریں گی۔نظم الحسن نے کہاکہ جولائی میں پاکستان کے ساتھ سیریز نہ ہونے سے خالی ہونے والی ونڈو میں ہماری سینئر ٹیم آرام کرے گی، پلیئرز ان دنوں ویسے بھی بہت زیادہ کھیل رہے اور ابھی چیمپئنز ٹرافی کیلیے تیاریاں جاری ہیں، اگست میں آسٹریلیا سے سیریز اور پھر جنوبی افریقہ بھی جانا ہے،واپسی پر وہ بنگلہ دیش پریمیئر لیگ میں حصہ لیں گے، اب مجھے پاکستانی ٹیم کے ٹور میں کوئی دلچسپی نہیں ہے، اگر جولائی میں سیریز کی ضرورت بھی پڑی تو ہم نے 4، 5 دیگرممالک کی فہرست تیار کی ہوئی ہے ان سے میچزکا اہتمام کریں گے۔واضح رہے کہ بنگلادیشی حکومت ان دنوں بھارت کے بیحد قریب ہے، دیگر شعبوں کی طرح کرکٹ میں بھی اس کا اثر دیکھنے میں آرہا ہے۔