برمنگھم میں قومی ٹیم کی سکیورٹی میں اضافہ

برمنگھم(نیوزایجنسیاں) مانچسٹر دھماکے کے بعد آئی سی سی چیمپئنز ٹرافی کیلئے برمنگھم میں موجود پاکستان کرکٹ ٹیم کی سیکیورٹی بڑھا دی گئی ہے۔آئی سی سی چیمپیئنز ٹرافی میں شرکت کے لیئے قومی کرکٹ ٹیم ان دنوں برطانیہ کے شہر برمنگھم میں موجود ہے جہاں مانچسٹر میں ہونے والے دھماکے کے بعد ٹیم کی سیکیورٹی بڑھادی گئی ہے۔اس سے قبل قومی کرکٹ ٹیم کے منیجر طلعت علی نے دھماکوں کے متاثرین سے اظہار ہمدردی کیا تھا اور آئی سی سی سے قومی ٹیم کی سیکیورٹی بہتر بنانے کا مطالبہ کیا تھا ، انہوں نے کہا تھا کہ ہماری سیکیورٹی مزید بہتر کی جائے اور ٹیم کا ہوٹل تبدیل کیا جائے یا دوسری ٹیموں کے ہوٹل میں ٹھہرایا جائے۔واضح رہے کہ پیر کی شب مانچسٹر میں ہونے والے کنسرٹ کے دوران دھماکے میں 22 افراد ہلاک اور درجنوں زخمی ہوئے تھے۔ جس کے بعد آئندہ ماہ انگلینڈ ہی میں شیڈول چیمپئنز ٹرافی اور ویمنز ورلڈ کپ کی سیکیورٹی پر بھی سوالیہ نشان عائد ہو چکا ہے، بھارتی کرکٹ بورڈ نے اس حوالے سے تحفظات کا اظہار کرتے ہوئے آئی سی سی کو خط بھی لکھا ہے۔ چیمپئنز ٹرافی کی تیاری کیلئے قومی کر کٹ ٹیم کا برمنگھم میں ٹریننگ کیمپ جاری ہے ، ٹیم نے برمنگھم میں آﺅٹ ڈور پریکٹس سیشن کیا ، کھلاڑیوں نے بیٹنگ، بولنگ اور فیلڈنگ پر خصوصی توجہ دینے کے علاوہ تفریح کرکے دل بہلایا۔ سابق کپتان مشتاق محمد نے بھی کھلاڑیوں کی ٹریننگ دیکھی۔ کھلاڑیوں نے آﺅٹ ڈور سیشن کیا جس میں فیلڈنگ، بیٹنگ اور بولنگ پر بھرپور توجہ دی گئی۔خوب محنت کے بعد کھلاڑیوں نے کچھ ریلیکس بھی کیااس میں بھی وہ سکون سے نہیں بیٹھے بلکہ دو ٹیمیں بناکر کھیل ہی کھیل میں فزیکل ٹریننگ کرتے رہے۔سابق کپتان مشتاق محمد نے بھی قومی کھلاڑیوں کی ٹریننگ دیکھی اور انہیں قیمتی مشورے بھی دیئے۔