عمران خان وزیراعظم ، علیم خان وزیر اعلیٰ پنجاب کے مضبوط امیدوار

اسلام آباد(مانیٹرنگ ڈیسک) تحریک انصاف نے وفاق میں حکومت سازی کیلئے مشاورت کا عمل تیز کردیا، اجلاس میں وفاقی کابینہ کیلئے ناموں پر مشاورت کی گئی، سپیکر قومی اسمبلی کیلئے عارف علوی اور شفقت محمود کے ناموں پر غور، فواد چوہدری کو وزارت اطلاعات اور شیخ رشید کو وزارت ریلوے سونپے جانے کا امکان ہے، نجی ٹی وی کے مطابق خسرو بختیار ، مراد سعید اور چوہدری سرور کو وفاقی کابینہ میں لئے جانے کا امکان ہے، شاہ محمود قریشی کو وزیرخارجہ اور شیریں مزاری کو وزیر دفاع بنایا جاسکتا ہے ، اسد عمر کو وزیر خزانہ بنانے کا فیصلہ پہلے ہی ہوچکا ہے، ملک امین اسلم کو مشیر برائے ماحولیات بنائے جانے کا امکان ہے ، وفاقی وزیر داخلہ کیلئے پرویز خٹک یا شفقت محمود مضبوط امیدوار ہوسکتے ہیں، اعظم سواتی ، غلام سرور، رمیش کمار ،عامر لیاقت اور شہریار آفریدی کے نام بھی زیر غور ہیں، عمران خان وزیراعظم اور علیم خان وزیراعلیٰ پنجاب کے مضبوط امیدوار ہیں۔ غیر سرکاری غیر حتمی نتائج کے مطابق تحریک انصاف کے پاس وفاق کے علاوہ پنجاب اور خیبر پختونخوا میں حکومت بنانے کے لئے مطلوبہ اکثریت حاصل ہوگئی ہے ۔ جس کے بعد اب پارٹی میں وزرائے اعلی اور اہم وزارتوں کے امیدوار بھی سامنے آگئے ہیں۔ذرائع کا کہنا ہے کہ علیم خان اور فواد چوہدری وزیر اعلی پنجاب کے امیدوار ہیں جب کہ گزشتہ دور حکومت میں خیبر پختونخوا کے صوبائی وزیر عاطف خان اب وزارت اعلی کے امیدوار ہیں۔سابق وزیر اعلی خیبر پختونخوا پرویز خٹک کی نظریں وفاقی وزارت داخلہ پر ہے، ڈاکٹر شیریں مزاری وزارت خارجہ اور نیشنل سیکیورٹی ڈویژن کی خواہشمند ہیں۔ جب کہ اسد عمر کو عمران خان پہلے ہی وزیر خزانہ نامزد کر چکے ہیں۔